EVANXEO SEGUNDO MATEO

Capítulo 2

¹Xesús naceu en Belén de Xudea, en tempos do rei Herodes. E nisto uns magos de Oriente chegaron a Xerusalén preguntando:
²^__Onde está o Rei dos xudeus que acaba de nacer? Porque vimos saír a súa estrela alá no Oriente, e vimos para renderlle homenaxe.
³Oíndo isto, o rei Herodes alporizouse, e con el toda Xerusalén.
⁴Convocou a todos os sacerdotes e letrados do pobo, para preguntarlles onde tiña que nacer o Mesías.
⁵Eles responderon: ^__En Belén de Xudea, que así o deixou escrito o profeta:
⁶E ti Belén, terra de Xudea,
de ningún xeito es a máis pequena,
entre as vilas de Xudea,
que de ti ha saír o guía

que será o pastor do meu pobo Israel

⁷Entón Herodes, ás agachadas, chamou os magos, para informarse ben de cando lles aparecera a estrela.
⁸Logo mandounos a Belén, dicíndolles: ^__Ide e informádevos ben do que hai dese neno; e unha vez que o atopedes, avisádeme, para ir eu tamén a renderlle homenaxe.
⁹Eles, despois de oíren ao rei, puxéronse en camiño. E, velaí, a estrela que viran saír no Oriente foinos guiando ata se deter enriba de onde estaba o neno.
¹⁰Grande alegría sentiron ao veren saír de novo a estrela.
¹¹E cando entraron na casa atoparon o neno con María, súa nai. Prostráronse e rendéronlle homenaxe; e abrindo os seus tesouros, ofrecéronlle como regalo ouro, incenso e mirra.
¹²Logo, avisados en soños de que non volvesen por onda Herodes, foron para a súa terra por outro camiño.

¹³En canto se foron, un anxo do Señor apareceulle a Xosé en soños e díxolle: ^__Érguete, colle o neno e mais a nai e fuxe para Exipto. Non te movas de alí ata que eu te avise, porque Herodes vai buscar o neno para acabar con el.
¹⁴Xosé ergueuse, colleu o neno e mais a nai, pola noite, e foise para Exipto.
¹⁵Alí permaneceu ata a morte de Herodes, cumpríndose así o que dixera o Señor por medio do profeta: Chamei o meu fillo para que saíse de Exipto.
¹⁶Daquela Herodes, decatándose de que fora burlado polos magos, incomodouse moito. E, botando contas polos datos dos magos, mandou matar a todos os nenos de dous anos para abaixo, de Belén e da bisbarra.
¹⁷Daquela cumpriuse tamén o dito polo profeta Xeremías:
¹⁸Oíuse un berro en Ramah,
choros e moito lamento:
é Raquel que chora polos seus fillos,

e non se quere consolar porque xa non existen

¹⁹En morrendo Herodes, o anxo do Señor aparecéuselle en soños a Xosé en Exipto
²⁰e díxolle: ^__Érguete, colle o neno e mais a nai e volve para a terra de Israel, que xa morreron os que querían acabar co neno.
²¹Ergueuse Xosé, e collendo o neno e mais a nai, foise para a terra de Israel.
²²Pero, ao saber que Arquelao reinaba en Xudea, en lugar de seu pai, sentiu medo e non se atreveu a ir alá. Avisado en soños, marchou para a banda de Galilea,
²³indo vivir a unha vila chamada Nazaré. Cumpriuse así o que dixeran os profetas: que se chamaría nazareno.