EVANXEO SEGUNDO MATEO

Capítulo 28

¹Pasado o sábado, na alborada do primeiro día da semana, María Magdalena e mais a outra María foron visitar o sepulcro.
²Entón produciuse un gran terremoto, xa que o anxo do Señor, baixando do ceo, removeu a lousa e sentou enriba dela.
³Tiña o aspecto dun relampo e o seu vestido era branco coma a neve.
⁴Os gardas tremeron co medo, ficando coma mortos.
⁵Mais o anxo díxolles ás mulleres: ^__Non teñades medo, ben sei que buscades a Xesús o crucificado.
⁶Non está aquí, resucitou tal como dixera. Vide ver o sitio onde estaba.
⁷E ide axiña dicirlles aos seus discípulos: “Resucitou de entre os mortos e vai diante de vós para Galilea: alí o veredes”. Iso é o que vos tiña que dicir.
⁸Elas marcharon do sepulcro con toda a présa, con temor pero cheas de gozo; e correron para llelo comunicaren aos seus discípulos.
⁹Entón Xesús saíulles ao encontro dicindo: ^__Alegrádevos. Elas, achegándose, abrazáronlle os pés e prostráronse ante el.
¹⁰Xesús díxolles: ^__Non teñades medo: ide avisar a meus irmáns de que marchen para Galilea, que alí me verán.

¹¹Mentres elas ían, algúns da garda foran á cidade para informaren aos sumos sacerdotes de canto acontecera.
¹²Eles, reuníndose cos anciáns, acordaron darlles unha boa presa de cartos aos soldados,
¹³encargándolles: ^__Vós dicide: “Os seus discípulos fórono roubar de noite, mentres nós durmiamos”.
¹⁴E, se o gobernador chega a saber algo, xa o convenceremos nós, sacándovos do apuro.
¹⁵Eles, collendo os cartos, fixeron tal como lles mandaran. E así correu este rumor entre os xudeus ata o día de hoxe.

¹⁶Os once discípulos fóronse para Galilea ao monte onde Xesús os citara.
¹⁷E véndoo, prostráronse ante el, aínda que algúns dubidaban.
¹⁸Xesús, achegándose, díxolles: ^__Déuseme todo poder no ceo e mais na terra.
¹⁹Ide, pois, e facede discípulos meus a todos os pobos, bautizándoos no nome do Pai e do Fillo e do Espírito Santo;
²⁰ensinándolles a gardar canto vos mandei. Asegúrovos que eu estarei sempre convosco ata a fin do mundo.