Capítulo 24

A RESURRECCIÓN

Anuncio da resurrección (Mt 28, 1-10; Mc 16, 1-8; Xn 20, 1-10)

• ¹A madrugada do primeiro día da semana foron ao sepulcro, levando os perfumes que tiñan preparados.
• ²Pero atoparon quitada a lousa, arredada do sepulcro.
• ³Entraron, e viron que o corpo do Señor non estaba alí.
• ⁴Entón, mentres estaban todas perplexas por aquilo, apareceron dous homes con vestidos resplandecentes.
• ⁵Cheas de medo, miraban para o chan; pero eles preguntaron: ^__Por que buscades entre os mortos a quen está vivo?
• ⁶Non está aquí; resucitou. Recordade o que vos dicía en Galilea:
• ⁷que cumpría que entregasen o Fillo do Home nas mans dos pecadores, que o crucificasen e que resucitase ao terceiro día.
• ⁸A elas acordáronlles aquelas palabras súas,
• ⁹e, volvendo do sepulcro, anunciáronllelo aos Once e a todos os demais.
• ¹⁰Eran elas: María Magdalena, Xoana e María a de Santiago. Tamén as outras que as acompañaban lles dicían o mesmo aos apóstolos;
• ¹¹pero eles non lles daban creto: parecíalles un desatino das mulleres.
• ¹²Mesmo así, Pedro ergueuse e foi correndo ao sepulcro; abaixándose, viu as vendas soas; e, todo abraiado polo acontecido, volveu para a súa casa.

Camiño de Emaús (Mc 16, 12-13)

• ¹³Aquel mesmo día dous deles ían camiño de Emaús, unha aldea que está a uns dez quilómetros de Xerusalén.
• ¹⁴Ían falando de canto pasara.
• ¹⁵E resulta que mentres parolaban e discutían, Xesús en persoa, achegouse e camiñaba canda eles.
• ¹⁶Pero os seus ollos estaban incapacitados para o recoñeceren.
• ¹⁷Entón preguntoulles: ^__De que ides falando polo camiño? Eles pararon cun rostro moi tristeiro,
• ¹⁸e Cleofás, un deles, respondeulle: ^__Seica es ti o único forasteiro en Xerusalén, que non sabe nada do que pasou alí durante estes días?
• ¹⁹El preguntou: ^__De que, logo? Eles contestaron: ^__Do asunto de Xesús o Nazareno, que foi un profeta poderoso en obras e palabras, ante Deus e ante o pobo todo;
• ²⁰de como os nosos sumos sacerdotes e demais xefes o condenaron a morte e o crucificaron.
• ²¹Nós esperabamos que el fose quen liberase a Israel; pero xa van alá tres días desde que pasaron estas cousas.
• ²²Claro que algunhas mulleres das nosas déronnos un susto, porque foron ao riscar o día ao sepulcro
• ²³e, ao non atoparen o corpo, volveron falando dunha visión de anxos, que lles aseguraron que el vive.
• ²⁴E algúns dos nosos alá foron ao sepulcro, atopando todo como as mulleres dixeran; pero a el non o viron.
• ²⁵Entón díxolles: ^__Que parvos e lentos sodes para crer todo o que anunciaron os profetas!
• ²⁶E logo non cumpría que o Cristo padecese todo isto, antes de entrar na súa gloria?
• ²⁷E comezando por Moisés e todos os profetas, foilles interpretando o que as Escrituras falaban del.
• ²⁸Ao achegarse á aldea onde ían, fixo coma quen quería seguir para adiante.
• ²⁹Pero eles porfiáronlle, dicindo: ^__Queda connosco, porque se fai tarde, e a noite bótase enriba. Quedou con eles.
• ³⁰E mentres estaban na mesa, colleu o pan, bendiciuno e partiuno e déullelo.
• ³¹Entón abríronselles os ollos e recoñecérono; pero el desapareceu.
• ³²E dixeron: ^__Non ardía o noso corazón, cando nos falaba polo camiño, interpretándonos as Escrituras?
• ³³E levantándose axiña, volveron a Xerusalén. Alí atoparon os Once reunidos cos seus acompañantes,
• ³⁴que dicían: ^__É certo, o Señor resucitou e aparecéuselle a Simón.
• ³⁵Eles tamén contaron o que lles pasara polo camiño e como o recoñeceran no partir o pan.

Aparición aos apóstolos (Mt 28, 16-20; Mc 16, 14-18; Xn 20, 20-23; Feit 1, 6-8)

• ³⁶Estando eles comentando estas cousas, presentóuselles Xesús no medio e díxolles: ^__A paz sexa convosco!
• ³⁷Sobresaltados e cheos de medo, coidaban contemplar un espírito.
• ³⁸Pero el díxolles: ^__Por que estades asustados e a que veñen esas dúbidas?
• ³⁹Mirade para as miñas mans e para os meus pés: sonvos eu. Palpade aquí e decatádevos de que un espírito non ten carne nin ósos, como vedes que teño eu.
• ⁴⁰E dicindo isto, mostroulles as mans e mais os pés.
• ⁴¹Pero eles, tolos de contento e sen saíren do seu asombro, non acababan de crer. Xesús preguntoulles: ^__Tedes por aí algo que comer?
• ⁴²Déronlle un anaco de peixe asado.
• ⁴³El colleuno e comeuno diante deles.
• ⁴⁴Logo díxolles: ^__A isto me refería eu cando, estando aínda convosco, vos dicía que conviña que se cumprise todo o que está escrito na Lei de Moisés, nos Profetas e mais nos Salmos acerca de min.
• ⁴⁵E abriu os seus entendementos para que comprendesen as Escrituras.
• ⁴⁶E engadiu: ^__Así está escrito: o Mesías padecerá e resucitará de entre os mortos no terceiro día,
• ⁴⁷e predicarase no seu nome a conversión e mais o perdón dos pecados a todos os pobos, empezando por Xerusalén.
• ⁴⁸Vós seredes testemuñas de todo isto.
• ⁴⁹E eu heivos mandar o don prometido por meu Pai. Mentres tanto seguide na cidade, ata que se vos revista co poder que vén de arriba.

Ascensión de Xesús (Mc 16, 19-20; Feit 1, 9-11)

• ⁵⁰Despois levounos para fóra, a un lugar preto de Betania, e alí, erguendo as mans, bendiciunos.
• ⁵¹E mentres os bendicía, foise separando deles, e foi elevado ao ceo.
• ⁵²Eles, despois de se prostraren ante el, volveron para Xerusalén cheos de alegría.
• ⁵³E seguían decote, no templo, bendicindo a Deus.