Capítulo 3

PREPARACIÓN DO MINISTERIO DE XESÚS

Predicación de Xoán o Bautista (Mt 3, 1-12; Mc 1, 1-8; Xn 1, 19-28)

• ¹No ano quince do reinado do emperador Tiberio César, sendo Poncio Pilato gobernador de Xudea e Herodes tetrarca de Galilea; sendo Filipo, seu irmán, tetrarca de Iturea e mais da Traconítide, e Lisanias, tetrarca de Abilene;
• ²durante o pontificado de Anás e Caifás, chegoulle a Palabra de Deus a Xoán, fillo de Zacarías, no deserto.
• ³Entón el percorreu toda a rexión do Xordán, pregoando un bautismo de conversión, para acadar o perdón dos pecados,
• ⁴conforme está escrito no libro do profeta Isaías:
• Unha voz chama no deserto:
• Preparade os camiños do Señor,
• reparade os seus vieiros.
• ⁵Todo barranco se encherá
• todo monte e outeiro se rebaixará,
• os camiños tortos hanse endereitar
• e os fragosos hanse achanzar.
• ⁶E todos verán a salvación de Deus.
• ⁷ Ía onda el moita xente a que os bautizase, e el dicíalles: ^__Camada de víboras!, quen vos ensinou a fuxir do castigo que está a chegar?
• ⁸Dade froitos dignos dunha verdadeira conversión, e non empecedes a dicir entre vós: “Somos fillos de Abraham”. Asegúrovos que destas mesmísimas pedras pode sacar Deus fillos de Abraham.
• ⁹Xa está a machada posta na raíz das árbores, e toda árbore que non dea bo froito, será cortada e botada no lume.
• ¹⁰E a xente preguntáballe: ^__E logo, que temos que facer?
• ¹¹El respondíalles: ^__O que teña dúas túnicas, que as reparta con quen non teña ningunha; e que faga o mesmo o que teña que comer.
• ¹²Foron tamén uns recadadores a se bautizar, e preguntáronlle: ^__Mestre, que temos que facer?
• ¹³El contestoulles: ^__Non esixades nada máis do que vos está mandado.
• ¹⁴Tamén uns soldados lle preguntaron: ^__E nós, que temos que facer? El contestoulles: ^__Non asoballedes nin saqueedes a ninguén, e contentádevos coas vosas pagas.
• ¹⁵Como o pobo estaba esperando polo Mesías, empezaba a pensar se acaso non o sería Xoán;
• ¹⁶pero el declarou diante de todos: ^__Eu bautízovos con auga, pero está a chegar o que é máis forte ca min, e a quen eu non son digno de lle desatar os amallós do seu calzado. El havos bautizar con Espírito Santo e con lume.
• ¹⁷Porque trae a forcada na man, para limpar a súa eira e recoller na hucha o seu trigo; mais a palla ha de queimala no lume que nunca apaga.
• ¹⁸Con esta e outras moitas exhortacións anunciáballe a Boa Nova á xente.
• ¹⁹Pero Herodes, o tetrarca, a quen Xoán reprendía por causa de Herodías, súa cuñada, e por outros crimes,
• ²⁰colmounos todos facendo aínda este: meteu a Xoán na cadea.

Bautismo de Xesús (Mt 3, 13-17; Mc 1, 9-11)

• ²¹Durante un bautismo xeral, e despois de se bautizar tamén Xesús, mentres oraba abriuse o ceo
• ²²e baixou sobre el o Espírito Santo na aparencia corporal dunha pomba. Entón oíuse unha voz desde o ceo: ^__Ti es o meu fillo benquerido, o meu predilecto; en ti me comprazo.

Xenealoxía de Xesús

• ²³Este era Xesús, que tiña trinta anos ao empezar; fillo, segundo se pensaba, de Xosé, que o era de Helí,
• ²⁴o de Matat, o de Leví, o de Melquí, o de Xanaí, o de Xosé,
• ²⁵o de Matatías, o de Amós, o de Nahum, o de Eslí, o de Nagai,
• ²⁶o de Máhat, o de Matatías, o de Semeín, o de Ioseh, o de Iodá,
• ²⁷o de Iohanán, o de Resá, o de Zerubabel, o de Xealtiel, o de Nerí,
• ²⁸o de Melquí, o de Adí, o de Casam, o de Elmadam, o de Er,
• ²⁹o de Xesús, o de Eliezer, o de Iozim, o de Matat, o de Leví,
• ³⁰o de Simeón, o de Xudá, o de Xosé, o de Ionam, o de Eliaquim,
• ³¹o de Meleá, o de Mená, o de Matatá o de Natán, o de David,
• ³²o de Iexé, o de Iobed, o de Boaz, o de Salá, o de Naasón,
• ³³o de Aminadab, o de Admín, o de Arní, o de Esrón, o de Peres, o de Xudá,
• ³⁴o de Xacob, o de Isaac, o de Abraham, o de Tara, o de Nacor,
• ³⁵o de Seruc, o de Ragau, o de Pélec, o de Éber, o de Salá,
• ³⁶o de Cainam, o de Arfaxad, o de Xem, o de Noé, o de Lámec,
• ³⁷o de Metuxalem, o de Henoc, o de Iáret, o de Malelel, o de Cainam,
• ³⁸o de Enox, o de Xet, o de Adán, o de Deus.