Capítulo 1

PRÓLOGO

• ¹No principio existía a Palabra, e a Palabra estaba onda Deus e a Palabra era Deus.
• ²Ela estaba no principio onda Deus.
• ³Todo foi feito por ela, e sen ela non se fixo nada do que foi feito.
• ⁴Nela estaba a vida, e a vida era a luz dos homes;
• ⁵a luz aluma na tebra e a tebra non a deu apagado.
• ⁶Houbo un home mandado por Deus: o seu nome era Xoán.
• ⁷Este veu de testemuña para dar testemuño da luz, para que todos cresen por el.
• ⁸Non era el a luz, senón que veu para dar testemuño da luz.
• ⁹(A Palabra) era a verdadeira luz que aluma a todo home que vén a este mundo.
• ¹⁰Ela estaba no mundo, e o mundo foi feito por ela, pero o mundo non a recoñeceu.
• ¹¹Veu á súa propiedade, e os seus non a acolleron.
• ¹²Pero a cantos a recibiron, –aos que cren no seu nome– deulles o poder de seren fillos de Deus.
• ¹³Estes, non naceron do sangue nin da vontade da carne, senón de Deus.
• ¹⁴E a Palabra fíxose carne, e plantou entre nós a súa tenda, e nós vimos a súa gloria, gloria coma de Unixénito que vén do Pai, cheo de graza e de verdade.
• ¹⁵Xoán dá testemuño del, exclamando: “Este évos de quen eu dixen: O que vén detrás miña, pasa diante miña, pois existía primeiro ca min”.
• ¹⁶E da súa abundancia recibimos todos nós graza e máis graza.
• ¹⁷Pois a Lei deuse por medio de Moisés; a graza e a verdade realizáronse por Xesucristo.
• ¹⁸A Deus ninguén o viu: o Unixénito, que está no seo do Pai, foi quen nolo revelou.

O LIBRO DOS SIGNOS

Dobre testemuño do Bautista

• ¹⁹E este é o testemuño de Xoán cando os xudeus lle mandaron de Xerusalén sacerdotes e levitas onda el, para lle preguntar: ^__Ti quen es?
• ²⁰El declarou e non negou. Declarou: ^__Eu non son o Cristo.
• ²¹Preguntáronlle: ^__Entón quen es ti? Es Elías? Contestou: ^__Non son. ^__Es o profeta? Respondeu: ^__Non.
• ²²Daquela dixéronlle: ^__E, logo, quen es?, para que lles poidamos dar unha resposta aos que nos mandaron. Que dis de ti mesmo?
• ²³El dicía: ^__Eu son a voz do que clama no deserto: “Endereitade o camiño do Señor!” (como escribira o profeta Isaías).
• ²⁴Algúns dos mandados eran fariseos,
• ²⁵e preguntáronlle: ^__Entón por que bautizas, se non es ti o Cristo nin Elías nin o profeta?
• ²⁶Xoán respondeulles: ^__Eu bautizo con auga; mais entre vós está quen vós non coñecedes;
• ²⁷o que vén detrás miña e eu non son merecente de lle desatar o amalló da sandalia.
• ²⁸Todo isto pasou en Betania, pola outra banda do Xordán, onde estaba Xoán bautizando.
• ²⁹Ao outro día, vendo a Xesús, que viña cara a el, dixo: ^__Velaí o Año de Deus, o que arrinca o pecado do mundo!
• ³⁰Este é de quen eu dixen: “Detrás miña vén un home que pasa diante miña, pois existía primeiro ca min”.
• ³¹Eu non o coñecía, mais para iso vin eu bautizar con auga: para llo mostrar a Israel.
• ³²E Xoán seguiu testemuñando: ^__Eu vin o Espírito baixar do ceo coma unha pomba e pousar enriba del.
• ³³Eu non o coñecía, pero o que me mandou bautizar con auga, díxome: “Cando vexas o Espírito baixar e pousar sobre un, ese é o que bautiza co Espírito Santo”.
• ³⁴E eu vino e dou testemuño de que este é o Fillo de Deus.

Os primeiros discípulos de Xesús: André e Pedro

• ³⁵Ao outro día estaba de novo Xoán con dous dos seus discípulos
• ³⁶e, vendo a Xesús que camiñaba, dixo: ^__Velaquí o Año de Deus.
• ³⁷Cando os dous discípulos oíron o que el falara, fóronse detrás de Xesús.
• ³⁸Volveuse Xesús e, vendo que eles o seguían, preguntoulles: ^__Que buscades? Eles respondéronlle: ^__Rabbí (que quere dicir “Mestre”), onde paras?
• ³⁹El díxolles: ^__Vide e veredes. E eles foron e viron onde paraba e quedaron con el aquel día. Era contra as catro da tarde.
• ⁴⁰Un dos dous que escoitaron a Xoán e seguiron a Xesús era André, o irmán de Simón Pedro.
• ⁴¹Vai e ao primeiro que atopa é a Simón, o seu propio irmán, e dille: ^__Encontramos o Mesías (que quere dicir “Cristo”).
• ⁴²E levouno onda Xesús. Ao velo, díxolle Xesús: ^__Ti es Simón, o fillo de Xoán. Ti haste chamar Cefas (que quere dicir Pedro).

Felipe e Natanael

• ⁴³Ao outro día decidiu Xesús saír para a Galilea; atopou a Felipe e díxolle: ^__Sígueme.
• ⁴⁴Felipe era de Betsaida, da vila de André e mais de Pedro.
• ⁴⁵Atopou Felipe a Natanael e díxolle: ^__Encontramos a aquel de quen escribiron Moisés na Lei e mais os Profetas: a Xesús, o fillo de Xosé, o de Nazaré.
• ⁴⁶Contestoulle Natanael: ^__E de Nazaré pode saír algo bo? Felipe díxolle: ^__Ven e verás!
• ⁴⁷Viu Xesús a Natanael, que se achegaba, e dixo del: ^__Aí tedes un verdadeiro israelita, en quen non hai dobrez.
• ⁴⁸Preguntoulle Natanael: ^__E de que me coñeces? Contestoulle Xesús: ^__Antes de que Felipe chamase por ti, xa eu te vira, cando estabas debaixo da figueira.
• ⁴⁹Respondeulle Natanael: ^__Rabbí, ti es o Fillo de Deus, ti es o rei de Israel.
• ⁵⁰Díxolle entón Xesús: ^__Porque che dixen que te vin debaixo da figueira, xa cres? Pois cousas máis grandes has ver.
• ⁵¹E concluíu: ^__Con toda verdade volo aseguro: haberedes ver o ceo aberto, e os anxos de Deus subindo e baixando onda o Fillo do Home.