Capítulo 18

A PAIXÓN

Xesús entrégase

• ¹En dicindo isto, saíu cos seus discípulos para a outra banda do regueiro Cedrón, onde había unha horta, na que entrou el e mais os seus discípulos.
• ²Tamén Xudas, o que o había entregar, coñecía aquela horta, pois en moitas ocasións estivera alí Xesús cos seus discípulos.
• ³Xudas, que levaba a patrulla e a garda dos sumos pontífices e dos fariseos, chegou alí con farois, fachos e armas.
• ⁴Entón Xesús, sabendo todo o que lle viña enriba, adiantouse e preguntoulles: ^__A quen buscades?
• ⁵Respondéronlle: ^__A Xesús de Nazaré. Díxolles el: ^__Eu son! Estaba tamén con eles Xudas, o que o entregaba.
• ⁶Cando lles dixo, “Eu son”, botáronse para atrás e caeron ao chan.
• ⁷Entón, preguntoulles outra vez: ^__A quen buscades? Eles contestaron: ^__A Xesús de Nazaré.
• ⁸Xesús respondeulles: ^__Díxenvos que son eu: así que, se me buscades a min, deixade marchar a estes.
• ⁹Así cumpriuse a palabra que dixera: “Non perdín ningún dos que me deches!”.
• ¹⁰Entón Simón Pedro, que tiña unha espada, desenvaiñouna e feriu ao garda do sumo sacerdote, rabenándolle a orella dereita. O nome do garda era Malco.
• ¹¹Pero Xesús díxolle a Pedro: ^__Mete a espada na vaíña. E, logo, non hei beber o cáliz que me deu o Pai?
• ¹²Entón a patrulla, o tribuno e mais os gardas dos xudeus, agarraron a Xesús e prendérono.

Interrogatorio de Xesús

• ¹³Levárono primeiro onda Anás, que era sogro de Caifás, o sumo sacerdote daquel ano.
• ¹⁴(Era Caifás aquel que lles dera aos xudeus o consello: “Convén que un home morra polo pobo”).
• ¹⁵Simón Pedro e mais outro discípulo seguían a Xesús. Este discípulo, por ser coñecido do sumo sacerdote, entrou con Xesús no adro do palacio do sumo sacerdote.
• ¹⁶Pedro estaba fóra, na porta. Entón saíu o outro discípulo ^__o coñecido do sumo sacerdote^__, falou coa porteira, e fixo entrar a Pedro.
• ¹⁷A porteira preguntoulle a Pedro: ^__Non es tamén ti dos discípulos dese home? El contestou: ^__Non son.
• ¹⁸Estaban os criados e os gardas facendo unha fogueira, porque facía frío, e aquecíanse. Estaba tamén Pedro con eles, de pé, aquecéndose.
• ¹⁹Entón o sumo sacerdote interrogou a Xesús acerca dos seus discípulos e da súa doutrina.
• ²⁰Xesús respondeulle: ^__Eu falei á vista do mundo, publicamente; eu sempre ensinei na sinagoga e no templo, onde se xuntan todos os xudeus, e non falei nada ás agachadas.
• ²¹Por que me preguntas a min? Pregúntalles aos que me oíron de que lles falei: eles saben ben o que dixen.
• ²²Ao dicir isto, un dos gardas alí presentes, deulle unha labazada a Xesús, dicindo: ^__Así lle respondes ao sumo sacerdote?
• ²³Xesús replicoulle: ^__Se falei mal, demóstrame en que; e se falei ben, por que me pegas?
• ²⁴Entón Anás mandouno amarrado onda Caifás, o sumo sacerdote.
• ²⁵Estaba Simón Pedro de pé, quentándose, e preguntáronlle: ^__Non es tamén ti dos seus discípulos? El negouno, dicindo: ^__Non son.
• ²⁶Un dos criados do sumo sacerdote, parente daquel a quen Pedro lle cortara a orella, replicoulle: ^__E logo non te vin eu na horta con el?
• ²⁷Pedro negou outra vez; e naquel momento empezou a cantar un galo.

Xesús perante Pilatos

• ²⁸Levaron entón a Xesús de onda Caifás ao Pretorio. Era a amañecida. Eles non entraron no Pretorio para non se contaminaren e así poderen comer a Pascua.
• ²⁹Saíu entón fóra Pilatos, onda eles, e preguntou: ^__Que acusación traedes contra este home?
• ³⁰Eles responderon: ^__Se este non fose un malfeitor, non cho entregabamos.
• ³¹Díxolles entón Pilatos: ^__Collédeo vós e xulgádeo segundo a vosa Lei. Os xudeus contestáronlle: ^__Non nos é lícito matar a ninguén.
• ³²Así se cumpriu a palabra de Xesús, sinalando con que morte había morrer.
• ³³Entón entrou Pilatos outra vez no Pretorio, chamou por Xesús e preguntoulle: ^__Es ti o Rei dos Xudeus?
• ³⁴Xesús respondeu: ^__Dis ti iso pola túa conta, ou dixéroncho outros de min?
• ³⁵Pilatos replicou: ^__E logo son eu xudeu? A túa xente e os sumos sacerdotes entregáronte a min: que fixeches?
• ³⁶Xesús contestoulle: ^__O meu reino non é deste mundo; se deste mundo fose, os meus oficiais loitarían para que ninguén me entregase aos xudeus; pero o meu reino non é de aquí.
• ³⁷Díxolle entón Pilatos: ^__Logo ti es rei? Xesús respondeu: ^__Tal como o estás dicindo, eu son Rei: para iso nacín e para iso vin ao mundo, para dar testemuño da verdade; todo o que está aberto á verdade, escoita a miña voz.
• ³⁸Pilatos preguntoulle: ^__Que é a verdade? E, dito isto, saíu onda os xudeus e díxolles: ^__Eu non atopo nel culpa ningunha.
• ³⁹Hai entre vós o costume de que eu vos solte alguén pola Pascua. Queredes, logo, que vos solte ao Rei dos Xudeus?
• ⁴⁰Berraron entón outra vez, dicindo: ^__Non. A ese non, a Barrabás. (O tal Barrabás era un bandido).