Capítulo 2

O primeiro signo nas vodas de Caná

• ¹O terceiro día houbo un casamento en Caná de Galilea, e estaba alí a nai de Xesús.
• ²Tamén foi convidado Xesús e mais os seus discípulos ao casamento.
• ³Chegou a faltar o viño e a nai de Xesús díxolle: ^__Non che teñen viño.
• ⁴Replicoulle Xesús: ^__Muller que ten que ver iso comigo e contigo? Aínda non chegou a miña hora.
• ⁵Súa nai díxolles entón aos servidores: ^__Facede o que el vos diga.
• ⁶Había alí seis píos de pedra para as purificacións dos xudeus, que levaban ao pé de cen litros cada unha.
• ⁷E ordenoulles Xesús: ^__Enchede de auga eses píos. Eles enchéronos de todo.
• ⁸Díxolles entón: ^__Collede agora e levádelle a proba ao mestresala. Eles levárona.
• ⁹E, cando o mestresala probou a auga volta viño, sen saber de onda viña (os servidores si que o sabían, que eles colleran a auga) falou co noivo
• ¹⁰e díxolle: ^__Todo o mundo pon de primeiras o viño bo e, cando xa están bébedos, o máis cativo; ti, en troques, deixaches o viño bo para agora.
• ¹¹Foi así como fixo Xesús o primeiro dos signos en Caná de Galilea; manifestou a súa gloria, e creron nel os seus discípulos.

Xesús en Cafarnaúm

• ¹²Despois disto baixou a Cafarnaúm, con súa nai, seus irmáns e mais os seus discípulos, e quedou alí uns poucos días.

Expulsa os mercadores do templo

• ¹³Estaba a chegar a Pascua dos xudeus e subiu Xesús a Xerusalén.
• ¹⁴Atopou no templo os que vendían bois, ovellas e pombas e mais os cambiadores, sentados;
• ¹⁵foi el e fixo un vergallo con cordas de xunco, botounos a todos fóra do templo e as ovellas e os bois tamén; guindou cos cartos e virou as mesas dos cambiadores;
• ¹⁶e aos que vendían as pombas, díxolles: ^__Arredádeme de aquí estas cousas, non fagades da casa do meu Pai unha casa de negocio.
• ¹⁷Lembráronse os seus discípulos de que estaba escrito: O celo da túa casa devórame.
• ¹⁸Pola súa parte, os xudeus preguntáronlle: ^__Que sinal nos mostras, para faceres estes feitos?
• ¹⁹Respondeulles Xesús: ^__Derrubade este templo e erguereino en tres días.
• ²⁰Replicáronlle os xudeus: ^__Corenta e seis anos levou edificar este templo e halo erguer ti en tres días?.
• ²¹Pero el dicíao referíndose ao templo do seu corpo.
• ²²Cando se ergueu de entre os mortos, lembraron os seus discípulos o que dixera e creron na Escritura e no dito de Xesús.

Fe imperfecta de moitos xudeus

• ²³Estando Xesús en Xerusalén pola festa da Pascua, moitos creron nel, vendo os signos que facía.
• ²⁴Pero, pola súa parte, Xesús non se fiaba deles, porque os coñecía a todos.
• ²⁵Non precisaba de que ninguén lle dese informacións de ninguén, que ben coñecía el o que había no home.