Capítulo 7

Incredulidade dos parentes de Xesús

• ¹E despois disto, andaba Xesús pola Galilea, e non quería andar pola Xudea, porque os xudeus queríano matar.
• ²Estaba a chegar a festa dos xudeus chamada das Cabanas.
• ³Dixéronlle entón seus irmáns: ^__Sae de aquí e vai para Xudea, para que tamén os teus discípulos vexan as obras que fas;
• ⁴porque quen quere ser famoso non actúa ás agachadas. Se fas esas cousas, móstrate ao mundo.
• ⁵(Era visto que nin seus irmáns crían nel).
• ⁶Xesús contestoulles: ^__O meu tempo aínda non chegou, pero o voso sempre está á man.
• ⁷Non pode o mundo aborrecervos a vós; pero a min aborréceme, porque eu testemuño contra el que as súas obras son ruíns.
• ⁸Subide vós á festa: eu non subo, que aínda non chegou o meu tempo.
• ⁹Despois desta conversa quedou na Galilea.
• ¹⁰Pero cando seus irmáns xa subiran á festa, entón tamén el subiu, non manifestamente, senón en secreto.

Xesús na festa das Cabanas

• ¹¹Entón os xudeus buscábano na festa, e dicían: ^__Onde está ese?
• ¹²E polo baixo a xente falaba moito del. Uns dicían: ^__É un bo home. Outros, ao revés: ^__Nada, nada: é un impostor.
• ¹³Mais ninguén falaba del en público, por medo aos xudeus.
• ¹⁴A iso da metade da festa, subiu Xesús ao templo e púxose a ensinar.
• ¹⁵Admirábanse entón os xudeus, dicindo: ^__Como é que este sabe todo o que sabe sen estudalo?
• ¹⁶Respondeulles Xesús: ^__A miña doutrina non é miña, senón daquel que me mandou.
• ¹⁷Se alguén quere facer a vontade de Deus, distinguirá se esta doutrina vén de Deus ou se é que eu falo pola miña conta.
• ¹⁸Quen fala pola súa conta, busca a propia gloria; polo contrario, quen procura o prestixio de quen o mandou, ese é veraz e non hai inxustiza nel.
• ¹⁹Non vos deu Moisés a Lei? E, con todo, ningún de vós a garda. Por que me queredes matar?
• ²⁰Respondeu a xente: ^__Seica tes o demo! Quen te quere matar a ti?
• ²¹Xesús replicou: ^__Fixen unha obra só, e todos vos marabillades.
• ²²Vexamos, logo, unha cousa. Moisés deuvos a circuncisión (que, ben mirado, non vén de Moisés, senón dos Pais) e, aínda que sexa sábado, vós circuncidades un home.
• ²³E se circuncidades un home en sábado, sen quebrantardes a Lei de Moisés, como é que vos alporizades comigo, porque curei en sábado a un home enteiro?
• ²⁴Non xulguedes pola aparencia, non: xulgade conforme á xustiza.
• ²⁵Algúns dos habitantes de Xerusalén comentaban: ^__Non é a este ao que lle trataban de dar morte?
• ²⁶Pois mira como fala á vista de todo o mundo e mais non lle din nada. Será que de verdade as autoridades chegaron a recoñecer que el é o Mesías?
• ²⁷O caso é que este sabemos de onde é, mentres que o Mesías, cando veña, ninguén saberá de onde é.
• ²⁸Gritou entón Xesús, mentres ensinaba no templo: ^__Así que a min coñecédesme e sabedes de onde son? Pois non vos vin pola miña conta: a min mandoume o Veraz, a quen vós non coñecedes.
• ²⁹Eu coñézoo, que de onda El son e foi El quen me mandou.
• ³⁰Daquela trataban de prendelo; pero ninguén lle botou man: aínda non chegara a súa hora.
• ³¹Moita xente creu nel, e dicía: ^__E o Mesías, cando veña, fará máis sinais ca este?
• ³²Oíron os fariseos que o pobo andaba nestes falares e entón eles e mais os xefes dos sacerdotes mandaron gardas para o prenderen.
• ³³Dixo entón Xesús: ^__Aínda estarei un pouquiño máis entre vós, e despois voume onda Aquel que me mandou.
• ³⁴Buscar buscarédesme, pero non me encontraredes, pois onde eu estea, vós non poderedes vir.
• ³⁵Dixéronlles uns xudeus a outros: ^__Para onde irá este, que non o poidamos atopar? Irá quizais para onda os emigrantes en terras dos gregos, predicarlles a eles?
• ³⁶Que significará iso que dixo: “Buscar, buscarédesme, pero non me encontraredes, e onde estea eu, vós non poderedes vir?”.
• ³⁷No derradeiro día, o máis grande da festa, púxose Xesús de pé, e gritou: ^__Se alguén ten sede, que veña onda min, e beba quen cre en min.
• ³⁸Como di a Escritura, deitaranlle do seu ventre regueiros de auga viva.
• ³⁹(Isto dicíao do Espírito que habían recibir cantos creran nel: pois daquela non había Espírito, porque Xesús non fora aínda glorificado).
• ⁴⁰Cando oíron isto, algúns de entre a xente, dicían: ^__Este é verdadeiramente o Profeta.
• ⁴¹Outros: ^__Este é o Mesías. Outros, en cambio, dicían: ^__Pero é que o Mesías vai vir da Galilea?
• ⁴²Non di a Escritura que o Mesías ha vir da semente de David, e de Belén, a vila de onde era David?
• ⁴³E houbo división no pobo, por causa del.
• ⁴⁴Algúns queríano prender, pero ninguén lle puxo enriba as mans.
• ⁴⁵Foron entón os gardas onda os xefes dos sacerdotes e os fariseos. Eles preguntáronlles: ^__Por que non o trouxestes?
• ⁴⁶Responderon os gardas: ^__Endexamais falou ninguén coma este home.
• ⁴⁷Respondéronlles os fariseos: ^__Seica vos engaiolou tamén a vós?
• ⁴⁸Vistes que algún dos maxistrados ou dos fariseos crese nel?
• ⁴⁹Non. E a xente esa, que non coñece a Lei, son uns malditos.
• ⁵⁰Un deles, Nicodemo, o que fora primeiro onda el, dixo:
• ^51__Desde cando a nosa Lei xulga a un home sen antes escoitalo e investigar o que fixo?
• ⁵²Respondéronlle: ^__Tamén ti es da Galilea? Pois estuda e verás como da Galilea non sae profeta ningún.

Xesús perdoa a unha adúltera

• ⁵³E fóronse cada un para a súa casa.