Capítulo 9

Curación dun cego de nacemento

• ¹Ao pasar, viu a un cego de nacemento.
• ²Entón preguntáronlle os seus discípulos: ^__Mestre, quen pecou, para que nacese cego: el ou seus pais?
• ³Xesús respondeu: ^__Nin pecou el nin os seus pais, senón que está cego para que se mostren nel as obras de Deus.
• ⁴Precisamos facer as obras do que me mandou mentres é día; está a chegar a noite e daquela ninguén pode traballar.
• ⁵Mentres eu estou no mundo, son a luz do mundo.
• ⁶Dito isto, cuspiu na terra e fixo lama co cuspe e untouna polos ollos do cego,
• ⁷dicíndolle: ^__Vaite lavar na piscina de Siloé (que quere dicir “enviado”). El foi, lavouse e volveu con vista.
• ⁸Entón os veciños e os que antes o viran andar a pedir preguntaban: ^__Non é este o que estaba sentado pedindo?
• ⁹Uns dicían: ^__Éche o mesmo. Outros: ^__Non, é un que se lle asemella. E el dicía: ^__Son eu.
• ¹⁰Entón preguntábanlle: ^__Daquela como se che abriron os ollos?
• ¹¹El respondeu: ^__O home que se chama Xesús fixo lama, untoume os ollos, e díxome: “Vai a Siloé e lávate”. Entón fun e, ao que me lavei, comecei a ver.
• ¹²Preguntáronlle: ^__Onde está ese? El contestou: ^__Non o sei.
• ¹³Levaron onda os fariseos ao que fora cego.
• ¹⁴(Era sábado o día que Xesús fixera lama e lle abrira os ollos).
• ¹⁵E outra vez lle preguntaban tamén os fariseos como chegara a ver. El respondeulles: ^__Untoume lama polos ollos, laveime e vexo.
• ¹⁶Algúns dos fariseos dicían: ^__Este home non vén de Deus, que non garda o sábado. Outros, en cambio, dicían: ^__Como ía poder un home pecador facer estes sinais? E había división entre eles.
• ¹⁷Entón preguntáronlle outra vez ao cego: ^__A ti que che parece ese home que lles deu a vista aos teus ollos? El contestou: ^__Que é un profeta.
• ¹⁸Os xudeus non lle creron que fose cego e que chegase a ver, ata que chamaron polos seus pais
• ¹⁹e lles preguntaron: ^__É este o voso fillo, o que vós dicides que naceu cego? Logo como é que agora ve?
• ²⁰Os pais responderon: ^__Nós sabemos que este é o noso fillo e que naceu cego:
• ²¹como é que agora ve, non o sabemos, nin sabemos tampouco quen lle deu a vista. Preguntádelle a el, que ten anos para falar en por si.
• ²²(Isto dixérono os pais, porque lles tiñan medo aos xudeus, pois xa se puxeran de acordo en que, se alguén o recoñecía como Mesías, botábano da sinagoga.
• ²³Por iso dixeron seus pais: “Ten idade, preguntádelle a el”).
• ²⁴Chamaron por segunda vez polo home que fora cego e dixéronlle: ^__Dá gloria a Deus: nós sabemos que ese home é un pecador.
• ²⁵El entón respondeu: ^__Eu non sei se é un pecador; só sei unha cousa: que eu antes era cego e que agora vexo.
• ²⁶Dixéronlle entón: ^__Pero que foi o que che fixo? Como che deu a vista?
• ²⁷Respondeulles: ^__Xa volo dixen e non me fixestes caso. Por que queredes oílo outra vez? Ou é que tamén queredes facervos discípulos del?
• ²⁸Eles enchérono de aldraxes e dixéronlle: ^__Serás ti discípulo del: nós somos discípulos de Moisés.
• ²⁹Nós sabemos que a Moisés lle falou Deus; deste, polo contrario, non sabemos de onde é.
• ³⁰O home replicoulles: ^__Pois nisto precisamente está o admirable: en que vós non sabedes de onde é e aos meus ollos deulles el a vista.
• ³¹Sabemos que Deus non escoita aos pecadores, pero se un é piadoso e fai a súa vontade, a ese escóitao.
• ³²Endexamais non se soubo de ninguén que dese vista a un cego de nacemento:
• ³³se este non viñese de Deus, non podía facer nada.
• ³⁴Respondéronlle eles: ^__Ti naciches todo metido en pecados e vasnos ensinar a nós? E botárono fóra.

A cegueira espiritual

• ³⁵Oíu Xesús que o botaran fóra, buscouno e preguntoulle: ^__Cres ti no Fillo do Home?
• ³⁶El respondeulle: ^__E quen é, Señor, para que crea nel?
• ³⁷Díxolle Xesús: ^__Éche o mesmo que estás vendo e que está a falar contigo.
• ³⁸El dixo: ^__Creo, Señor. E prostrouse diante del.
• ³⁹Entón dixo Xesús: ^__Para realizar un xuízo vin eu a este mundo: para que os que non ven, vexan, e os que ven se volvan cegos.
• ⁴⁰Oíron isto algúns dos fariseos que estaban onda el, e preguntáronlle: ^__E, logo, nós tamén estamos cegos?
• ⁴¹Xesús contestoulles: ^__Se estivésedes cegos, non teriades pecado; mais, como dicides que vedes, o voso pecado permanece.