Capítulo 12

Agripa I persegue á Igrexa. Martirio de Santiago. Prisión e liberación de Pedro

• ¹Por ese tempo o rei Herodes botou man dalgúns membros da Igrexa, para os maltratar.
• ²Mandou matar coa espada a Santiago, o irmán de Xoán,
• ³e, vendo que iso lles agradaba aos xudeus, mandou prender tamén a Pedro. Era a semana da Pascua.
• ⁴Prendeuno, logo, e meteuno na cadea, gardándoo con catro piquetes de catro soldados cada un. Quería presentalo diante do pobo despois da Pascua.
• ⁵Mentres Pedro estaba retido no cárcere, a Igrexa rezaba intensamente a Deus por el.
• ⁶A noite antes de que Herodes o presentase diante do pobo, estaba Pedro durmindo entre dous soldados, ligado con dúas cadeas, e unhas sentinelas facían a garda diante da porta da prisión.
• ⁷De súpeto, presentouse o anxo do Señor, e unha luz resplandeceu na cela; e, tocándolle no costado, espertou a Pedro e díxolle: ^__Érguete correndo! E caéronlle as cadeas das mans.
• ⁸Entón díxolle o anxo: ^__Pon o cinto e calza as sandalias. E así o fixo. Despois díxolle: ^__Bota o manto por riba e sígueme.
• ⁹Pedro saíu e seguiuno, sen se dar conta que era realidade o que se facía por medio do anxo, pois coidaba que era unha visión.
• ¹⁰Atravesaron a primeira garda e logo a segunda, e chegaron á porta de ferro que daba á cidade e abriuse ela soa. E ao saíren á rúa, logo o deixou o anxo.
• ¹¹Entón Pedro, volvendo en si, dixo: ^__Agora realmente vexo que o Señor mandou o seu anxo, para me librar das mans de Herodes e de todo o que esperaba o pobo xudeu.
• ¹²E xa con todo o acordo, dirixiuse á casa de María, a nai do Xoán, chamado Marcos, onde había moita xente reunida rezando.
• ¹³Petou na porta da entrada e unha criada, chamada Rode, foi ver quen era.
• ¹⁴Recoñeceu a voz de Pedro e deulle tal alegría, que, se había de abrir o portal, correu a avisar que Pedro estaba na porta.
• ^15__Estás tola!, ^__dixéronlle. Mais ela aseguraba que era certo. Os outros dicían: ^__Será o seu anxo.
• ¹⁶Pedro seguía petando. Entón abriron, e ao velo, ficaron pasmados.
• ¹⁷Acenoulles coa man para que calasen e contoulles como o Señor o librara da prisión; e díxolles: ^__Mandádelle recado a Santiago e aos irmáns. E liscou de alí para outro sitio.
• ¹⁸Ao abrir o día armouse un bo rebumbio entre os soldados, preguntándose que sería de Pedro.
• ¹⁹Cando Herodes mandou por el e non o encontraron, interrogou aos gardas e mandounos executar. Despois baixou de Xudea a Cesarea e quedou alí.

Morte de Herodes Agripa I

• ²⁰Herodes estaba aborrecido cos de Tiro e Sidón. Estes presentáronselle en comisión e, logo de gañaren para a causa deles a un tal Blasto, xefe da casa do rei, solicitaron a paz, pois o seu país dependía economicamente do territorio do rei.
• ²¹No día sinalado, Herodes, revestido co manto real e sentado na tribuna, dirixiulles un discurso.
• ²²O pobo berraba: ^__É a voz dun deus, non a dun home!
• ²³E no intre feriuno o anxo do Señor por non ter dado gloria a Deus. Morreu comesto dos vermes.

Bernabé e Saulo volven para Antioquía

• ²⁴A palabra de Deus medraba e multiplicábase.
• ²⁵Bernabé e Saulo, cumprida a súa misión en Xerusalén, volvéronse levando con eles a Xoán, de sobrenome Marcos.