Capítulo 14

Non se pode xulgar os irmáns

• ¹A quen ten a fe débil, acollédeo sen criticar opinións.
• ²Hai quen cre poder comer de todo, pero o feble non come máis ca verduras.
• ³O que come, non desprece ao que non come; e o que non come, non condene ao que come, pois tamén a este o acolle Deus.
• ⁴Quen es ti para xulgar o criado alleo? Que siga en pé ou que caia, é cousa do seu Señor. Pero seguro que seguirá en pé, porque o Señor ten forza para o manter dereito.
• ⁵Hai quen dá máis importancia a un día que a outro; en troques, outro considera todos os días igual. Que cadaquén obre por plena convicción.
• ⁶Quen garda un día gárdao para o Señor; quen come de todo faino polo Señor e dálle grazas a Deus; e quen non come tamén o fai polo Señor e, a proba é que tamén lle dá grazas a Deus.
• ⁷Ningún de nós vive para si, e ningún de nós morre para si.
• ⁸Se vivimos, para o Señor vivimos; e, se morremos, para o Señor morremos; así que, vivamos ou morramos, somos do Señor.
• ⁹Por iso mesmo morreu e resucitou Cristo: para ser dono dos mortos e dos vivos.
• ¹⁰E ti, por que xulgas a teu irmán? E ti, por que desprezas a teu irmán? Se todos temos que comparecer diante do tribunal de Deus!
• ¹¹Porque está escrito:
• Pola miña vida, di o Señor:
• todo xeonllo se dobrará diante de min,
• e toda lingua ha de confesar a Deus.

Evitar o escándalo dos irmáns

• ¹²Por tanto cada un de nós dará conta de si a Deus.
• ¹³Non nos xulguemos uns a outros, máis ben coidade de non lle pór ao irmán nin tropezo nin escándalo.
• ¹⁴Sei e estou seguro no Señor Xesús que non hai cousa impura de seu. As cousas son impuras para quen as ten por impuras.
• ¹⁵Polo tanto, se por causa de comeres unha determinada comida se entristece teu irmán, xa non te portas con caridade. Que por culpa da túa comida non pereza alguén por quen Cristo morreu.
• ¹⁶Que o que é ben para vós non sexa ocasión de maledicencia.
• ¹⁷Pois o Reino de Deus non é comida nin bebida, senón xustiza, paz e alegría no Espírito Santo.
• ¹⁸Quen nisto serve a Cristo é agradable a Deus e considerado polos homes.
• ¹⁹Procuremos, logo, aquilo que leva á paz e á mutua edificación.
• ²⁰Por unha cuestión de comida non destrúas a obra de Deus. Todo é certamente puro, pero está mal comer causando escándalo a outros.
• ²¹É mellor non comer carne nin beber viño nin nada, se iso fai tropezar a teu irmán.
• ²²A convicción que ti tes, gárdaa para ti diante de Deus. Benia quen toma a súa decisión sen complexos de culpabilidade!
• ²³Pero o que ten dúbidas, condénase se come, porque non o fai con boa conciencia, e todo canto non se fai con boa conciencia é pecado.