Capítulo 6

Os apertos do ministerio apostólico

• ¹Como colaboradores seus, exhortámosvos a non desaproveitar a graza de Deus.
• ²Pois di El: no tempo oportuno escoiteite; en día de salvación acudinche. Pois agora é tempo oportuno, agora é día de salvación.
• ³Nunca damos motivo de escándalo en nada, para que o noso ofrecemento non se poida censurar.
• ⁴Ao contrario, acreditámonos decote como servidores de Deus con tanto como sufrimos: tribulacións, adversidades, angustias,
• ⁵golpes, prisións, tumultos, angueiras, noites en vela, días sen comer,
• ⁶actuando con limpeza, con siso, con paciencia, con bondade, coa guía do Espírito Santo, con amor sincero,
• ⁷coa mensaxe da verdade e a forza de Deus, empuñando na dereita e na esquerda as armas da honradez,
• ⁸tanto na honra coma na afronta, tanto na boa coma na mala sona. Pasamos por falsarios, e mais dicimos a verdade;
• ⁹pasamos por descoñecidos, e ben que se nos coñece; pasamos por moribundos, e mais ben vivos que estamos; pasamos por destinados ao castigo, e mais nunca nos executaron;
• ¹⁰pasamos por xente triste, e ben alegres que estamos sempre; pasamos por pobres, e mais enriquecemos a moitos; pasamos por xente que non ten nada, e mais témolo todo.
• ¹¹Falámosvos francamente, corintios, abrímosvos de todo o noso corazón.
• ¹²Non é dentro de nós onde estades apertados; é, máis ben, nas vosas entrañas.
• ¹³Pois correspondede vosoutros agora: xa que vos falo como fillos, abrídevos tamén vós.

As relacións cos pagáns

• ¹⁴Non vos xuntedes en parella desigual cos infieis. Que ten que ver a rectitude coa maldade? Ou é que poden andar xuntas luz e escuridade?
• ¹⁵Que sintonía pode haber entre Cristo e Beliar? Pode o crente ser parceiro do infiel?
• ¹⁶Que consenso pode haber entre o templo de Deus e mais os ídolos? Nós somos templo de Deus vivo; así o dixo Deus: hei vivir e camiñar con eles; serei o seu Deus e eles serán o meu pobo.
• ¹⁷Por iso di o Señor: saíde do medio desa xente, afastádevos, non toquedes o que é impuro, e eu acollereivos.
• ¹⁸Serei un pai para vós e vós seredes para min fillos e fillas, di o Señor que todo o sostén.