Capítulo 5

Cristo fíxonos libres

• ¹Cristo liberounos para que vivamos en liberdade. Estádeme, logo, ben firmes nel!: que non vos canguen outra vez o xugo da escravitude!
• ²E mirade que eu, Paulo, xa vos deixo ben avisados de que, se vos facedes circuncidar, Cristo non vos vai servir de nada.
• ³E a todo o que se me faga circuncidar, eu vólvolle asegurar que queda obrigado a cumprir coa Lei enteiriña.
• ⁴Os que procurades na Lei a vosa xustificación, rompestes con Cristo, saístes da graza.
• ⁵Porque a nós o Espírito móvenos a agardar da fe os bens da xustificación esperada.
• ⁶Porque en Cristo Xesús estar ou non estar circuncidados non importa para nada: o único que importa é a fe que actúa a través do amor.
• ⁷Tan ben como iades! Quen vos poñería o pé diante para que xa non obedezades á verdade?
• ⁸Esta vosa idea non vén, de certo, do que vos chama:
• ⁹cun chisco de fermento abonda para levedar a masa toda.
• ¹⁰Mais eu teño posta a confianza no Señor en que vós haberedes pensar coma min. Iso si, ese que vos perturba ha levar o seu merecido, sexa quen sexa.
• ¹¹E eu, meus irmáns, se disque aínda predico a circuncisión, como é que aínda me perseguen? Porque daquela estaría eliminado o escándalo da cruz.
• ¹²Vaites cos que vos andan a quentar a cabeza! Mágoa que non se castren eles!

SECCIÓN EXHORTATIVA: VIVIR A LIBERDADE NO ESPÍRITO

Usar ben a liberdade

• ¹³Irmáns, a vós chamáronvos á liberdade. Pero coidadiño con servir aos baixos instintos co gallo da liberdade! Habédesme ser escravos uns dos outros mediante o amor.
• ¹⁴Porque toda a Lei está completa neste precepto: Amarás o teu próximo coma a ti mesmo.
• ¹⁵Pero, se vos adentades e devorades, levade tento de non acabardes uns cos outros.
• ¹⁶Pois quérovos dicir que vivades conforme o Espírito e, que non cedades aos proídos do instinto.
• ¹⁷Porque os baixos instintos devecen contra o Espírito e o Espírito contra os baixos instintos: opóñense tanto entre eles, que non facedes o que de verdade queredes.
• ¹⁸Mais, se vos guiades polo Espírito, xa non estaredes máis baixo a Lei.
• ¹⁹As obras dos baixos instintos téndelas ben á vista: fornicación, adulterio, libertinaxe,
• ²⁰idolatría, bruxerías, xenreiras, liortas, cobiza, retesías, discordias, faccións,
• ²¹envexas, bebedelas, enchentes e cousas polo estilo. Xa vos avisei ben avisados de que non herdarán o Reino de Deus os que tal fagan.
• ²²En cambio o froito do Espírito é o amor, alegría, paz, paciencia, agarimo, bondade, formalidade,
• ²³mansedume e dominio de si. Contra isto non hai Lei que valla.

Vivir no Espírito

• ²⁴Os de Cristo Xesús crucificaron os baixos instintos coas súas paixóns e cobizas.
• ²⁵Se vivimos no Espírito, sigamos como norma o Espírito.
• ²⁶Non hai que ser farfalláns. Non se hai que encirrar uns cos outros. Non nos temos que envexar.