Capítulo 5

• ¹Facédevos, logo, imitadores de Deus, como fillos queridos,
• ²e camiñade no amor, igual ca Cristo, que vos amou e que se entregou por nós como ofrenda e vítima a Deus, de recendo agradable.
• ³De inmoralidades ou de cobizas que nin sequera se fale entre vós, como corresponde a cristiáns.
• ⁴Nin haxa tampouco groserías, estupideces ou vulgaridades: son cousas que non proceden. En vez diso dádelle grazas a Deus.
• ⁵Tede por certo que quen se dea á prostitución, á inmoralidade ou á cobiza (que é unha idolatría) non herdará o Reino de Cristo e de Deus.

Vivir “na luz”

• ⁶Que ninguén vos engaiole con palabras baleiras, que por estas cousas vén a ira de Deus sobre os fillos rebeldes.
• ⁷Non vos fagades cómplices delas,
• ⁸porque antes si, erades tebras pero agora sodes luz no Señor. Así que andade como fillos da luz,
• ⁹(porque a luz é toda bondade, xustiza e verdade),
• ¹⁰tendo en conta o que lle agrada ao Señor.
• ¹¹E non compartades as obras estériles das tebras; polo contrario, denunciádeas,
• ¹²que do realizado por eses tales ás agachadas dá vergonza mesmo falar.
• ¹³Pero todo iso, cando o delata a luz, queda ao descuberto,
• ¹⁴pois todo o que se manifesta é luz. Por iso se di:
• Acorda, ti que estás a durmir,
• érguete do medio dos mortos
e Cristo iluminarate.

Normas concretas de conduta

• ¹⁵Mirade, logo, con tino como camiñades: non coma atolados senón coma sensatos,
• ¹⁶aproveitando ben este tempo, que corren días malos.
• ¹⁷Por iso, non sexades irreflexivos: ao contrario, tratade de comprender cal é a vontade do Señor.
• ¹⁸Non vos emborrachedes con viño, que leva á libertinaxe; en vez diso enchédevos de Espírito,
• ¹⁹falando entre vós con salmos, himnos e cánticos espirituais, cantando e salmodiando con toda a alma para o Señor,
• ²⁰e dándolle grazas decote a Deus Pai, por todo, no nome do noso Señor Xesús Cristo.

As relacións domésticas

• ²¹Sede ben guiados uns cos outros por respecto a Cristo:
• ²²as mulleres sométanse aos propios maridos, como se fosen o Señor,
• ²³pois o marido é cabeza da muller, como tamén Cristo é cabeza da Igrexa, o salvador do corpo.
• ²⁴E, como a Igrexa se somete a Cristo, así tamén as mulleres aos seus maridos, en todo.
• ²⁵Homes, amade as vosas mulleres, como tamén Cristo amou a Igrexa e se entregou por ela
• ²⁶para santificala, purificándoa co baño de auga na palabra,
• ²⁷e para presentala deste xeito diante de si, radiante, sen lixo nin engurra nin cousa polo estilo, senón santa e inmaculada.
• ²⁸Así deben tamén os maridos amar as súas mulleres coma os seus propios corpos. Quen ama a súa muller, ámase a si mesmo,
• ²⁹porque ninguén odiou endexamais a súa propia carne, senón que a mantén e aquece, como fai Cristo coa Igrexa,
• ³⁰porque somos membros do seu corpo.
• ³¹Por iso deixará o home a seu pai e mais a súa nai e unirase á súa muller e serán os dous un só corpo.
• ³²Grande misterio é este e eu refíroo a Cristo e á Igrexa.
• ³³En calquera caso, todos e cada un de vós, debe amar a súa muller como a si mesmo; e a muller, que respecte o seu marido.