Capítulo 1

Saúdo

• ¹Paulo, apóstolo de Cristo Xesús por mandado de Deus, noso Salvador, e de Cristo Xesús, nosa esperanza,
• ²a Timoteo, fillo lexítimo na fe, deséxoche a graza, a misericordia e a paz de Deus Pai e de Cristo Xesús, noso Señor.

Evitar as falsas doutrinas

• ³Xa che pedira que quedases en Éfeso, cando eu ía marchar a Macedonia, para lles mandares a algúns que non ensinen doutrinas alleas,
• ⁴nin se afeccionen aos mitos e xenealoxías sen conta: cousas que se prestan máis para discusións que para a realización do plan de Deus, que se basea na fe.
• ⁵A finalidade desta instrución é o amor, que sae dun corazón puro, dunha conciencia boa e dunha fe sincera.
• ⁶Algúns deles, trabucándose, extraviáronse en lerias;
• ⁷pretenden ser doutores na Lei e non entenden nin o que din nin o que tan rotundamente afirman.
• ⁸Nós sabemos que a Lei é boa, sempre que se utilice como se debe;
• ⁹tendo en conta, que non se dita a Lei para o xusto, senón para os prevaricadores e rebeldes, para os impíos e pecadores, para os profanadores e sacrílegos, para os parricidas e matricidas, para os homicidas,
• ¹⁰os fornicadores, homosexuais, tratantes de escravos, mentiráns, perxuros e para todo aquel que se opón á boa doutrina,
• ¹¹que cadra co Evanxeo da gloria do Deus bendito, que se me confiou.

Acción de grazas polos favores recibidos

• ¹²Doulle grazas a Cristo Xesús, noso Señor que me fortaleceu, porque fiou en min, encomendándome o ministerio:
• ¹³a min, que fora un blasfemo, perseguidor e infamador; pero compadeceuse, porque eu obrei por ignorancia, sen ter aínda fe;
• ¹⁴e a graza do noso Señor abundou coa fe e o amor, que hai en Cristo Xesús.
• ¹⁵Esta é palabra segura, merecente de que todos a acollan: que Cristo Xesús veu ao mundo para salvar os pecadores, dos que eu son o primeiro.
• ¹⁶Pero por iso mesmo compadeceuse, a fin de que Cristo Xesús amosase en min, o primeiro, toda a súa paciencia como exemplo para os que habían crer nel para lograr a vida eterna.
• ¹⁷Ao Rei dos séculos, inmortal, invisible, único Deus: honra e gloria polos séculos dos séculos! Amén.

Recomendación a Timoteo

• ¹⁸Vouche facer unha gran encomenda, meu fillo Timoteo, conforme as mensaxes inspiradas que se refiren a ti, para que, apoiado nelas, sosteñas un bo combate,
• ¹⁹armado de fe e boa conciencia. Algúns rexeitárona e naufragaron na fe:
• ²⁰entre eles están Himeneo e Alexandre, aos que entreguei ao Maligno, para que aprendan a non blasfemar.