Capítulo 4

Denuncia das falsas doutrinas

• ¹O Espírito di ben claro que nos tempos derradeiros algúns se afastarán da fe e lles farán caso a espíritos mentireiros e á doutrina dos demos,
• ²extraviados por raposeiros argallantes que teñen cauterizada a súa conciencia.
• ³Estes prohibirán que a xente case e coma certos alimentos, sendo así que Deus os creou para que con gratitude os coman os que cren e os que coñecen a verdade.
• ⁴Porque todo o que Deus creou é bo e nada é rexeitable, cando se come con gratitude,
• ⁵porque o santifica a palabra de Deus e a oración.

As virtudes do bo ministro de Cristo

• ⁶Propoñéndolles estas cousas aos irmáns, serás un bo servidor de Cristo Xesús, alimentado coas palabras da fe e da boa doutrina, que con tanto coidado seguiches.
• ⁷Rexeita as fábulas profanas e antigas, e exercítate na auténtica piedade.
• ⁸O exercicio corporal é útil para pouco tempo; pero a piedade verdadeira é útil para sempre, porque contén a promesa da vida presente e da que está por vir.
• ⁹Esta palabra é moita verdade e todos debían acollela:
• ¹⁰para isto traballamos e loitamos, porque esperamos en Deus vivo, que é o Salvador de todos os homes e maiormente dos que cren.
• ¹¹Pregoa e ensina estas cousas.
• ¹²Que ninguén faga pouco de ti por seres tan novo. Ti faite exemplo dos que cren: en ditos e feitos, en caridade, en fe, en limpeza.
• ¹³Mentres non chego, dedícate á lectura, á exhortación, ao ensino.
• ¹⁴Non descoides o carisma que hai en ti, que se che deu pola profecía coa imposición das mans dos “presbíteros”.
• ¹⁵Coida estas cousas, mantente nelas, para que todos vexan como progresas.
• ¹⁶Preocúpate de ti e da doutrina; mantente en todo iso, que, facéndoo, te salvarás ti e salvarás os que che fagan caso.