Capítulo 1

Saúdo

• ¹Paulo, apóstolo de Cristo Xesús por vontade de Deus para anunciar a promesa da vida que hai en Cristo Xesús,
• ²a Timoteo, fillo querido: deséxoche a graza, a misericordia e a paz de Deus e de Cristo Xesús noso Señor.

Fidelidade ao Evanxeo

• ³Doulle grazas a Deus, a quen sirvo desde o nacemento con conciencia limpa, porque decote me lembro de ti nas miñas oracións, noite e día.
• ⁴Cando me acordan as túas bágoas, véñenme ganas de te ver para me encher de alegría,
• ⁵lembrando a túa fe sincera, que xa habitou na túa avoa Loide e na túa nai Eunice, e confío que tamén en ti.
• ⁶Por esta mesma causa recórdoche que reavives o carisma de Deus, que hai en ti pola imposición das miñas mans.
• ⁷Porque Deus non nos deu un espírito feble, senón forte, de amor e de sobriedade.
• ⁸Non teñas vergonza de noso Señor, nin de min, preso por el; ao contrario, faite partícipe dos meus sufrimentos polo Evanxeo, contando co poder de Deus.
• ⁹El vivificounos e chamounos cunha vocación santa, non polas nosas obras, senón polo seu designio e pola graza que nos deu en Cristo Xesús antes de todos os tempos,
• ¹⁰e que se manifestou agora pola aparición do noso Salvador, Cristo Xesús. El destruíu a morte e alumou a vida e a inmortalidade por medio do Evanxeo.
• ¹¹Deste Evanxeo constituíronme a min pregoeiro, apóstolo e mestre.
• ¹²Por esta causa precisamente padezo estas cousas. Pero non me importa, porque sei de quen me fiei, e estou certo que é podente para custodiar ata aquel día o depósito que me confiou.
• ¹³Mantén como regra as palabras saudables que me escoitaches verbo da fe e da caridade de Cristo Xesús.
• ¹⁴Garda o precioso depósito por medio do Espírito Santo, que mora en nós.
• ¹⁵Saberás que se distanciaron de min todos os de Asia, entre eles Fíxelo e Hermóxenes.
• ¹⁶Concédalle o Señor misericordia á familia de Onesíforo, que me tivo animado moitas veces e non se avergoñou de que eu fora un preso.
• ¹⁷Aínda máis, cando cheguei a Roma, axiña me buscou e atopoume:
• ¹⁸que o Señor lle conceda achar a súa misericordia naquel día. E cantos servizos fixo en Éfeso, coñécelos ti mellor ca min.