Capítulo 2

Deberes dos diferentes fieis

• ¹Pola túa parte, ensina o que é conforme á boa doutrina.
• ²Que os vellos sexan sobrios, serios, prudentes; sans na fe, na caridade, na paciencia.
• ³As vellas, o mesmo: que sexan honestas no coidado da súa compostura, nin lingoreteiras, nin moi amigas do viño, mestras do ben,
• ⁴para que exhorten ás novas a quereren aos seus homes e aos seus fillos:
• ⁵asisadas, limpas, boas administradoras da casa, submisas aos seus propios homes, para non desprestixiar a palabra de Deus.
• ⁶Exhorta tamén aos novos a seren asisados,
• ⁷mostrándote ti mesmo en todo como exemplo de boa conduta: incorrupto na doutrina e serio.
• ⁸Ensina unha palabra sa e indiscutible, para que o contrario se avergonce, non tendo nada malo que dicir de nós.
• ⁹Que os escravos se lles sometan en todo aos seus amos e sexan servizais e non respondóns,
• ¹⁰nin raspiñeiros; ao contrario, que sexan plenamente fieis e honrados, para faceren honor á doutrina de Deus, o noso Salvador.

Fundamento deses deberes

• ¹¹Porque a graza de Deus viuse que era fonte de salvación para todos os homes.
• ¹²Ela ensínanos a que reneguemos da impiedade e das cobizas mundanas e vivamos no mundo presente dun xeito asisado, xusto e respectuoso,
• ¹³agardando a bendita esperanza e a manifestación gloriosa do noso gran Deus e Salvador Xesús Cristo.
• ¹⁴El entregouse por nós, para nos redimir de toda iniquidade e purificar para si un pobo escolleito, afervoado, dedicado ás boas obras.
• ¹⁵Di estas cousas, exhorta e reprende con toda autoridade; que ninguén te desprece.