Capítulo 1

• ¹Paulo, preso por Cristo Xesús, e mais o irmán Timoteo, saudámoste a ti, o noso querido amigo e colaborador Filemón,
• ²e saudamos tamén á irmá Apia, ao noso camarada Arquipo e á comunidade que se xunta na túa casa.
• ³Desexámosvos a alegría e a paz de Deus, o noso Pai, e do Señor Xesús Cristo.
• ⁴Doulle grazas decote ao meu Deus, ao me lembrar de ti nas miñas oracións,
• ⁵porque oio falar do amor e da fidelidade que tes ao Señor Xesús e a todos os membros do pobo santo.
• ⁶Pido que a solidariedade da túa fe se poña en marcha, ao comprenderes que todo o ben que temos é para Cristo.
• ⁷Alegroume e animoume moito a túa caridade, meu irmán: grazas a ti, o pobo santo está máis confortado.
• ⁸Por iso, aínda que teña liberdade en Cristo para che mandar o que veña ao caso,
• ⁹cádrame máis pedircho, apelando á túa caridade. Así, sen máis título que ser eu Paulo, un vello que agora está preso por Cristo Xesús,
• ¹⁰pídoche por Onésimo, o meu fillo, que xerei estando na cadea.
• ¹¹En tempos foiche inútil, mais agora vai ser un verdadeiro “Onésimo”, é dicir, útil para ti e para min tamén.
• ¹²Velaí cho mando. Velaí che vai unha parte de min. Recíbeo!
• ¹³Pensei en me quedar con el, para que me axudase no teu lugar, mentres estou preso polo Evanxeo.
• ¹⁴Pero non quixen facer nada sen contar co teu consentimento, para que non fagas este ben á forza, senón porque che sae de dentro.
• ¹⁵Igual por iso marchou de onda ti algún tempo: a fin de que agora o recuperes para sempre,
• ¹⁶non xa como escravo, senón como algo máis ca escravo: coma un irmán benquerido. Para min é moi querido; moito máis o vai ser para ti, como home e como cristián!
• ¹⁷Así que se me consideras un amigo, acólleo coma a min.
• ¹⁸Se en algo te prexudicou ou se algo che debe, pono na miña conta.
• ¹⁹Eu, Paulo, firmo co meu puño e letra: pagareino eu. Iso para non falar de que ti mesmo te me debes.
• ²⁰Anda, irmán; que eu saque algo de ti no Señor. Tranquilízate ti como cristián.
• ²¹Escríboche fiando en que me vas facer caso e sabendo que has facer máis do que eu che digo.
• ²²Ai, e vaime preparando onde parar, que, grazas ás vosas oracións, ides ter o regalo de que eu vaia aí.
• ²³Recordos de Epafras, o meu compañeiro de cadea, en Cristo Xesús.
• ²⁴Saúdos dos meus colaboradores: Marcos, Aristarco, Dimas e Lucas.
• ²⁵A graza do Señor Xesús Cristo sexa convosco!