Capítulo 3

SUMO SACERDOTE QUE SE DOIA DUN E DE QUEN UN SE POIDA FIAR

Fiarse de Moisés e fiarse de Xesús

• ¹Por iso, meus sagrados irmáns, que tedes parte na mesma chamada celeste, atendede ao pregoeiro e Sumo Sacerdote da fe e da esperanza que profesamos, Xesús.
• ²El merécelle fe ao que o puxo, coma a Moisés, á fronte de toda a súa familia.
• ³Porque Xesús ten ben merecida unha gloria tanto máis grande ca a de Moisés, canto ten máis honor o que constrúe unha casa do que a casa mesma:
• ⁴porque toda casa ten un construtor, pero o que constrúe todo é Deus.
• ⁵Abofé, Moisés mereceu confianza como criado, para poder testemuñar a toda a casa o que lle foran dicindo;
• ⁶mais Cristo mereceu a confianza como Fillo e sobre a súa propia casa: casa del somos nós, se nos mantemos achegados a Deus na liberdade e se nos prezamos do que esperamos.

Chamada á fidelidade para entrar no acougo de Deus

• ⁷Por isto, fala o Espírito Santo:
• Se hoxe oídes a súa voz,
• ⁸non endurezades o voso corazón, coma cando vos rebelastes,
• coma o día da proba no deserto,
• ⁹cando vosos pais me tentaron, para veren onde chegaba, aínda que xa viran os meus feitos
• ¹⁰durante corenta anos: por isto me deu carraxe
• aquela xente,
• e dixen: o corazón ándalles sempre descarreirado,
• non se deron conta do meu comportamento;
• ¹¹por iso xurei cheo de indignación:
• endexamais non entrarán no meu acougo!
• ¹²Ollade, irmáns, non sexa que algún de vós teña un ruín e incrédulo corazón, que o aparte do Deus vivo;
• ¹³vós, en troques, alentádevos uns aos outros día tras día, mentres se pregoa este hoxe, de xeito que ningún de vós se deixe endurecer, engaiolado polo pecado.
• ¹⁴Porque seguimos sendo compañeiros de Cristo, sempre que manteñamos firme ata a fin a confianza absoluta de cando comezamos.
• ¹⁵Xa que se nos di:
• Se hoxe oídes a súa voz,
non endurezades o voso corazón, coma cando vos rebelastes.
• ¹⁶Mais quen foron os que se rebelaron, cando oíron? Acaso non foron todos os que, grazas a Moisés, saíron de Exipto?
• ¹⁷Quen foron os que anoxaron a Deus durante corenta anos? Acaso non foron os que por pecar caeron mortos no deserto?
• ¹⁸E a quen lles xurou que non entrarían no seu acougo, senón aos que se rebelaran?
• ¹⁹E vemos que non puideron entrar por falta de fe.