CARTA AOS HEBREOS

Capítulo 8

¹Isto é o máis importante de todo o que imos dicindo: que temos un Sumo Sacerdote de tal categoría que tomou posesión do seu trono no ceo á dereita do trono da Maxestade,
²ao mesmo tempo que oficiou como sacerdote no santuario e na tenda verdadeira, que erixiu o Señor, non un home.
³Xa que todo Sumo Sacerdote se constitúe para ofrecer dons e sacrificios: por iso cumpría que el tivese algo que poder ofrecer.
⁴Pois se a súa ofrenda fose terreal, nin sequera el sería sacerdote, habendo como hai os que lexitimamente ofrendan dons.
⁵Aínda que estes dan culto a un asomo, a unha sombra das realidades celestes, conforme ao que se lle revelou a Moisés cando estaba para construír a tenda-santuario: Olla que has de facer todo, segundo o exemplo que se che mostrou no monte.
⁶Pero, de feito, ao noso Sumo Sacerdote tocoulle unha liturxia tanto máis importante canto máis poderosa é a alianza da que é mediador, xa que esta alianza está legalmente establecida, apoiada en promesas de máis valía.

⁷Pois, se aquela primeira alianza fose sen falla, xa non habería lugar para unha segunda.
⁸Porque Deus, reprendéndoos, dilles: Vede que virán días di o Señor
nos que establecerei coa casa de Israel
e coa casa de Xudá unha alianza nova;
⁹non coma a alianza que fixen con seus pais,
cando os collín pola man,
para sacalos de Exipto:
porque eles non permaneceron fieis á miña alianza,
e tamén eu me desentendín deles, di o Señor.
¹⁰Pois esta é a alianza que pactarei coa casa de Israel,
cando cheguen aqueles días ^__di o Señor^__: cando dea as miñas leis,
héillelas escribir nos seus corazóns e nas súas mentes.
Eu serei para eles o seu Deus e eles serán para min o meu pobo.
¹¹Xa ninguén terá que ensinar ao seu veciño
nin cadaquén ao seu irmán, dicíndolle: ‘Recoñece ao Señor’;
porque me han coñecer todos eles,
desde o máis pequeno ao máis grande,
¹²xa que estarei disposto a perdoarlles as súas maldades,
e xa non me lembrarei máis dos seus pecados.
¹³Ao chamarlle Deus nova a esta alianza, deixou anticuada a primeira; abofé, o anticuado e avellado está próximo a desaparecer.