Capítulo 5

• ¹E vós, os ricos, chorade e berrade polas desgrazas que van vir enriba de vós.
• ²A vosa riqueza está podrecida; a vosa roupa chea de couza;
• ³o voso ouro e a vosa prata, enferruxados; e a mesma ferruxe será testemuño en contra vosa e, coma se for lume, comerá as vosas carnes. Estades atesourando na fin dos tempos!
• ⁴Atención! O xornal que non lles pagastes aos obreiros que vos fixeron a seitura está clamando e o seu berro chega aos oídos do Señor dos Exércitos.
• ⁵Vivistes na terra cheos de fartura e cebastes os vosos corazóns nos praceres para o día da matanza.
• ⁶Condenastes o xusto e matástelo sen que el vos fixese fronte.

Saber agardar

• ⁷Tede, logo, paciencia, irmáns, deica a volta do Señor. Reparade en como o labrego coa esperanza posta nos preciosos froitos da terra agarda con paciencia as augas temperás e as serodias.
• ⁸Tede tamén vós paciencia e collede folgos, porque o Señor axiña chegará.
• ⁹Non vos queixedes, irmáns, uns dos outros, para que non vos sentencien; mirade que o xuíz está xa á porta.
• ¹⁰No sufrimento e na paciencia, irmáns, seguide o exemplo dos profetas que falaron no nome do Señor.
• ¹¹Mirade que agora nós chamámoslles benaventurados aos que aturaron todo. Tedes oído falar da paciencia de Xob e xa vedes a fin que lle concedeu o Señor, porque o Señor é compasivo e misericordioso.
• ¹²Sobre todo, irmáns, non xuredes: nin polo ceo nin pola terra, nin por cousa ningunha. Que o voso si, sexa si; e que o voso non, sexa non; para que non vos sometan a xuízo.

A oración

• ¹³Anda magoado algún de vós? Que rece. Séntese alegre? Que cante salmos.
• ¹⁴Algún de vós ten unha doenza? Faga traer os anciáns da comunidade, para que recen por el, unxíndoo con aceite no nome do Señor.
• ¹⁵E a oración feita na fe salvará o enfermo; o Señor fará que se erga e, se tiver pecados, perdoaránselle.
• ¹⁶Así que confesádevos mutuamente os vosos pecados e rezade uns polos outros para que teñades saúde. Moito pode a oración teimosa do xusto.
• ¹⁷Elías era un home coma calquera de nós; pediu afervoadamente que non chovese e non choveu nada en tres anos e medio;
• ¹⁸volveu pedir e o ceo mandou auga e a terra deu os seus froitos.
• ¹⁹Meus irmáns, se algún de vós se arreda da verdade e outro o trae ao bo camiño,
• ²⁰tede seguro que quen fai que un pecador volva dos seus camiños trabucados, salvará a súa alma da morte e soterrará unha chea de pecados.