Capítulo 1

Himno do comezo

• ¹O que pasou desde o comezo, o que temos oído, o que teñen visto os nosos ollos, o que contemplamos nós e palparon as nosas mans, a saber, a Palabra que é a vida
• ^2__porque a vida manifestouse e nós vímola e damos testemuño dela, e anunciámosvola a vós: a vida eterna, que estaba na intimidade do Pai e que se nos amosou a nós^__:
• ³iso que temos visto e oído agora tamén volo anunciamos a vós, para que tamén vós teñades parte connosco, pois compartir connosco é compartir co Pai e co seu Fillo Xesús Cristo.
• ⁴Escribímosvos isto para que a nosa alegría sexa ben cumprida.

Primeiro criterio de vida cristiá: Deus é Luz, debemos vivir na Luz

• ⁵Esta é a mensaxe que lle temos oído a El e que agora vos anunciamos a vós: que Deus é Luz e que nel non hai escuridade ningunha.
• ⁶Se aseguramos que estamos en comuñón con El e vivimos na escuridade, mentimos e non practicamos o que cremos.
• ⁷Pero se nós vivimos na Luz, do mesmo xeito que El está na Luz, entón estamos en comuñón uns cos outros e o sangue de Xesús, o seu Fillo, estanos purificando de todos os pecados.
• ⁸Se dicimos que non temos pecado, desviámonos e non temos en nós a verdade.
• ⁹Se recoñecemos publicamente os nosos pecados, fiel e xustificador é Deus; El perdoaranos os pecados e limparanos de toda ruindade.
• ¹⁰Se dicimos que endexamais non pecamos, estamos facendo de Deus un mentireiro e non podemos ter connosco a súa revelación.