Capítulo 1

Saúdo

• ¹Eu, o Presbítero, escríbolle á señora elixida e mais aos seus fillos, aos que quero na verdade ^__e non só eu senón todos os que recoñecen a verdade^__,
• ²grazas á verdade que está dentro de nós e que nos acompañará sempre.
• ³Obra da verdade e mais do amor será que nos acompañen o favor, a misericordia e a paz que nos vén de Deus Pai e de Xesús Cristo, o Fillo do Pai.

O mandamento do amor

• ⁴Algúns dos teus fillos déronme unha alegría moi grande, cando vin que vivían na verdade, conforme o que o Pai nos mandou.
• ⁵Agora, pídoche, señora, que nos queiramos ben uns aos outros; e con isto non che anuncio un mandamento novo senón o mandamento que recibimos desde un principio.
• ⁶O amor consiste nisto: en vivirmos conforme os seus mandamentos. Este é o mandamento que oístes desde o principio para que vivades conforme el.

Os anticristos

• ⁷Agora andan polo mundo moitos sedutores que non profesan que Xesús Cristo veu en carne mortal: Velaí o sedutor e o Anticristo!
• ⁸Mirade por vós mesmos: para non perderdes o que traballastes, senón para recibirdes a paga enteira.
• ⁹Todo aquel que se pasa da raia e non segue a doutrina de Cristo, non ten a Deus consigo. Quen segue a doutrina, ten consigo ao Pai e mais ao Fillo.
• ¹⁰Se vos fai unha visita alguén que non traia esta doutrina, nin lle ofrezades pousada nin lle deades a “benvida”;
• ¹¹quen lle dea a “benvida”, faise cómplice das súas malas obras.

Despedida

• ¹²Aínda que teño moitas cousas para vos dicir, non o quero facer con papel e tinta. Espero irvos ver e falarvos cara a cara, para que, deste xeito, a nosa alegría sexa completa.
• ¹³Saúdante os fillos da túa irmá, a elixida.