Capítulo 1

Saúdo

• ¹Eu, o Presbítero, escríbolle ao benquerido Gaio, a quen amo na verdade.
• ²Meu amigo, pido para ti saúde e que o éxito en todos os teus asuntos te acompañe sempre.
• ³Canto me alegrei cando chegaron uns irmáns e nos falaron da túa aceptación da mensaxe, de como vives na verdade!
• ⁴Para min non hai alegría meirande ca esta: a de oír que os meus fillos viven de acordo na verdade.

A cooperación de Gaio

• ⁵Meu amigo, estaste comportando conforme a fe en todo o que fas polos irmáns e maiormente polos irmáns forasteiros.
• ⁶Eles diante da comunidade falaron ben do teu amor. Farías ben en seguir fornecéndoos para a viaxe, como Deus manda.
• ⁷Pois, por mor do Nome marcharon sen recibiren nada dos pagáns.
• ⁸Por iso, nós temos a obriga de axudar a homes coma estes, para sermos colaboradores do anuncio da verdade.

A actitude dominante de Diotrefes

• ⁹Escribinlle unha carta a esa comunidade, pero o dominante Diotrefes non nos acepta.
• ¹⁰Por iso, cando vos vaia ver, botareille na cara o que fai, as palabras malignas con que nos denigra. Ademais, non satisfeito con isto, nin acepta el aos irmáns, nin llelo permite facer aos que os queren aceptar, e bótaos fóra da comunidade.
• ¹¹Meu amigo, non imites o mal senón o ben. Quen obra ben, vén de Deus; quen obra mal, endexamais non viu a Deus.

Testemuño favorable a Demetrio

• ¹²De Demetrio todos falan ben e falan a verdade. E nós tamén falamos o ben e sabes que o noso testemuño é conforme a verdade.

Despedida

• ¹³Aínda teño moitas cousas que che dicir, pero non o quero facer con tinta e pluma.
• ¹⁴Espero verte moi axiña e falar cara a cara.
• ¹⁵A paz sexa contigo. Mándanche saúdos os teus amigos. Saúda os meus amigos, un por un.