Capítulo 15

Introdución ás sete pragas das sete cuncas

• ¹Logo vin outro grande e admirable sinal no ceo: sete anxos coas sete pragas, as derradeiras, pois a ira de Deus chega con elas ao cabo.
• ²Despois vin coma un mar de cristal mesturado con lume, e aos que saíron con ben da loita coa besta, coa súa imaxe e co número do seu nome, vinos de pé enriba do mar de cristal, con cítaras para o canto de Deus.
• ³Cantaban o cántico do servo de Deus, Moisés, e o cántico do Año, dicindo: ^__Grandes e admirables son as túas obras, Señor Deus, que todo o sostés; xusto e fiel é o teu comportamento, Rei das nacións.
• ⁴Quen non respectará e glorificará o teu nome, Señor? Porque só ti es santo. Todas as nacións virán e adorarante prostradas perante Ti, porque os teus xustos xuízos quedaron ben á vista.
• ⁵E despois disto mirei e vin que se abriu o santuario celeste, a tenda do testemuño.
• ⁶Do santuario saíron os sete anxos coas sete pragas, vestidos de liño curado e lucente, cinguidos con faixas de ouro polo peito.
• ⁷E unha das catro bestas deulles aos sete anxos sete cuncas de ouro cheas da ira do Deus que vive polos séculos dos séculos.
• ⁸Logo encheuse o santuario de fume por causa da gloria de Deus e por causa do seu poder. E ninguén podía entrar no santuario, ata que chegasen á fin as sete pragas dos sete anxos.