Capítulo 17

• ¹Logo veu falar comigo un dos sete anxos que tiñan as sete cuncas, e díxome: ^__Ven acó, que che hei mostrar o xuízo de condenación da gran prostituta que está sentada onda as augas abundantes;
• ²foi a prostituta dos reis da terra e co viño da súa fornicación emborracháronse os habitantes da terra.

VITORIA DO AÑO SOBRE A GRAN BABILONIA

Visión da gran Prostituta

• ³Logo arrebatoume en arroubo ao deserto e vin unha muller montada nunha besta vermella, chea de nomes blasfemos, que tiña sete cabezas e dez cornos.
• ⁴A muller estaba vestida de púrpura e escarlata, adornada de ouro, de pedras preciosas e de perlas; tiña na man unha copa de ouro chea de abominacións, e tiña tamén as porcalladas da súa fornicación.
• ⁵Sobre a fronte tiña escrito un nome misterioso: “A gran Babilonia, a nai das prostitutas e das abominacións da terra”.
• ⁶Logo vin que a muller estaba borracha do sangue do pobo santo e do sangue dos mártires de Xesús. E, ao mirar para ela, quedei abraiado.

Visión clarificadora do significado da gran Prostituta

• ⁷E díxome o anxo: ^__Por que te admiraches? Vouche explicar eu o sentido misterioso da muller e da besta que a leva, a das sete cabezas e os dez cornos.
• ⁸A besta que viches existía, pero xa non existe, e vai subir do abismo camiño da súa perdición; e os habitantes da terra, que non teñen os seus nomes escritos no libro da vida desde a creación do mundo, hanse admirar ollando que a besta existía, que xa non existe e que volverá aparecer.
• ⁹Para isto cómpre entendemento de sabio: as sete cabezas son sete montes sobre os que está sentada a muller; e tamén son sete reis:
• ¹⁰cinco deles xa caeron, un aínda reina, o outro aínda non veu e, cando veña, pouco vai durar.
• ¹¹A besta, que existía pero xa non existe, é o rei oitavo e ao mesmo tempo é un dos sete; e tamén vai camiño da súa perdición.
• ¹²Os dez cornos que viches, son dez reis, que aínda non recibiron a dignidade de reis; pero han recibir xuntamente coa besta poder coma de reis, aínda que só por unha hora.
• ¹³Todos eles teñen o único plan de lle daren a súa forza e mais o seu poder á besta.
• ¹⁴Faranlle a guerra ao Año. Pero o Año venceraos: por algo é Señor de señores e Rei de reis; e tamén os vencerán os chamados, os escolleitos e os fieis que están con El.
• ¹⁵Logo díxome: ^__As augas sobre as que viches sentada a prostituta, son pobos e multitudes, nacións e linguas diferentes.
• ¹⁶Pero os dez cornos que viches e mais a besta aborrecerán a prostituta: deixarana abandonada e espida, comerán a súa carnaza e volverana cinsa co lume.
• ¹⁷Pois Deus puxo nos seus corazóns que levasen a cabo o seu plan, un plan común a todos: de lle daren á besta a súa dignidade rexia, ata que teñan cumprimento os decretos de Deus.
• ¹⁸A muller que viches é a gran cidade, a que reina sobre os reis da terra.