Capítulo 2

PARTE EXHORTATIVA: AS SETE CARTAS

A carta á Igrexa de Éfeso

• ¹Ao anxo da Igrexa de Éfeso escríbelle: Isto di quen apreixa coa súa dereita as sete estrelas, quen pasea entre os sete candelabros de ouro:
• ²Coñezo as túas obras e fatigas e mais a túa enteireza e vexo que non podes aturar os malos. Puxeches a proba aos que se teñen por apóstolos sen seren apóstolos e ti atopáchelos falsos.
• ³Eu sei ben que tes esperanza e paciencia e por iso aguantaches por causa miña e non estás canso.
• ⁴Pero teño contra ti que perdiches o teu amor primeiro.
• ⁵Acórdate de onde caíches: arrepíntete e ponte a facer as obras de antes. Porque che vou vir cambiar o teu candelabro de sitio, caso de non te arrepentires.
• ⁶Aínda que unha cousa tes a teu favor: que aborreces a conduta dos nicolaítas, que eu tamén aborrezo.
• ⁷Quen teña oídos, escoite o que o Espírito lles di ás igrexas. Ao vencedor heille dar a comer da árbore da vida, que está no xardín de Deus.

A carta á Igrexa de Esmirna

• ⁸Ao anxo da Igrexa de Esmirna escríbelle: Isto di o Primeiro e o Último, o que estivo morto pero volveu á vida:
• ⁹Coñezo o teu sufrimento e a túa pobreza ^__aínda que es rico^__ e a maledicencia contra ti dos que se teñen por xudeus sen seren xudeus pero que si son sinagoga de Satanás.
• ¹⁰Non teñas medo ningún do que vas sufrir. Ollade que Satán vos ha meter a algúns de vós no cárcere, para vos poñer a proba e teredes sufrimento dez días. Pero mantente fiel ata a morte e dareiche a coroa da vida.
• ¹¹Quen teña oídos, escoite o que o Espírito lles di ás igrexas. Ao vencedor prométolle que non o vai danar a morte segunda.

A carta á Igrexa de Pérgamo

• ¹² Ao anxo da Igrexa de Pérgamo escríbelle: Isto di quen ten a espada de dous fíos ben afiada:
• ¹³Sei que onde vives é onde Satanás ten o seu trono e que te mantés firme comigo e non negaches a fe en min nin cando Antipas, o meu mártir que tamén fiaba en min, caeu asasinado aí onda vós, onde vive Satanás.
• ¹⁴Pero teño contra ti unhas poucas cousas: que tes aí algunha xente enleada coa doutrina de Balaam, que ensinaba a Balac a escandalizar aos fillos de Israel, incitándoos a comer carne sacrificada aos ídolos e a darse á prostitución.
• ¹⁵Así tamén ti tes algúns que profesan a doutrina dos nicolaítas.
• ¹⁶Arrepíntete, que, como non o fagas, vou vir axiña e loitarei contra eles coa espada da miña boca.
• ¹⁷Quen teña oídos, escoite o que o Espírito lles di ás igrexas. Ao vencedor heille dar do maná escondido e tamén unha pedriña branca; e escrito na pedriña un nome novo que ninguén coñece, fóra daquel que a recibe.

A carta á Igrexa de Tiátira

• ¹⁸Ao anxo da Igrexa de Tiátira escríbelle: Isto di o Fillo de Deus, que ten os seus ollos coma a chama do lume e os pés semellantes ao metal:
• ¹⁹Coñezo as túas obras, o teu amor, a túa fe, o teu servizo, a túa enteireza e as túas obras últimas, que son máis grandes ca as primeiras.
• ²⁰Pero teño contra ti que deixas que unha muller, Iezabel, se poña o título de profetisa, que ensine e que engaiole os meus servos para que se dean á prostitución e a comeren carne sacrificada aos ídolos.
• ²¹Deille tempo para se arrepentir, pero ela non se quere arrepentir da súa prostitución.
• ²²Ides ver como a vou encamar, e aos que se dean á prostitución con ela voulles mandar un gran sufrimento, a menos que se arrepintan das obras dela;
• ²³e os fillos dela vounos matar cun andazo. Así coñecerán todas as igrexas que eu son o que sonda os sentimentos e as intencións e o que vos dá a cadaquén segundo as vosas obras.
• ²⁴Pero a vós, aos de Tiátira que non sodes desta doutrina e que non coñecedes os profundos misterios de Satanás ^__como eles din^__, dígovos que non vos impoño outro peso.
• ²⁵Unicamente que vos agarredes ben ao que tedes, ata que eu volva.
• ²⁶Ao vencedor, a quen practique ata a fin as miñas obras, heille dar poder sobre os xentís,
• ²⁷e ha de os gobernar cun caxato de ferro, e escachizaraos coma unha ola de barro,
• ²⁸o mesmo que eu recibín poder do meu Pai; e heille dar o luceiro da alba.
• ²⁹Quen teña oídos escoite o que o Espírito lles di ás igrexas.