Capítulo 22

• ¹Daquela mostroume un río de auga vivificadora, clara coma un cristal, que saía do trono de Deus e do Año.
• ²Contra do medio da rúa principal da cidade, a unha e outra beira do río, había unha árbore da vida, que dá doce colleitas por ano, unha cada mes, e os froitos e as follas destas árbores son boas para curar ás nacións.
• ³Alí endexamais non haberá nada maldito. Nela estará o trono de Deus e mais do Año; e será alí onde os seus servidores o servirán.
• ⁴Verano cara a cara, e levarán o seu nome escrito na fronte.
• ⁵Alí endexamais non haberá noite nin precisarán da luz da lámpada nin da luz do sol, porque o Señor Deus será a luz que os alume, e eles serán reis polos séculos dos séculos.

EPÍLOGO

O anxo, Xoán e Xesús dan fe do libro

• ⁶Logo díxome: ^__Estas palabras merecen fe e son verdadeiras, pois o Señor, o Deus que inspira os profetas, mandou o seu anxo, para que lles amosase aos que o serven as cousas que han acontecer axiña.
• ⁷Mira que veño deseguida. Benia o que fai caso ás profecías que están neste libro.
• ⁸Eu, Xoán, son o que oín e vin todo isto. Cando o acabei de oír e ver, prostreime en adoración aos pés do anxo que mo amosaba.
• ⁹Pero el díxome: ^__Non, iso non! Eu son compañeiro de servizo teu e dos teus irmáns os profetas e dos que fan caso das palabras deste libro: adorar, adora a Deus.
• ¹⁰E díxome: ^__Non gardes en secreto a mensaxe profética deste libro, que o intre do seu cumprimento está a chegar.
• ¹¹Quen fai mal, que o siga facendo; o que é impuro, que siga na impureza; o que é honrado, que siga actuando honradamente; o de conciencia limpa, que a siga mantendo limpa.
• ¹²Mira que vou chegar axiña e traio comigo a miña paga, para lle pagar a cada un conforme o seu traballo.
• ¹³Eu son o Alfa e o Omega, o Primeiro e o Último, o Principio e a Fin.

Liturxia conclusiva

• ¹⁴Benia os que teñen lavada a súa roupa, para teren dereito á árbore da vida e a entraren polas portas da cidade.
• ¹⁵Fóra quedarán os cans, os bruxos, os luxuriosos, os asasinos, os idólatras, e todo o que é amigo das mentiras e fai trampas.
• ¹⁶Eu, Xesús, mandeivos o meu anxo, para que vos dese testemuño de todo isto que se refire ás igrexas. Eu son o renovo e a descendencia de David, o luceiro brillante da mañá.
• ¹⁷O Espírito e a esposa din: ^__Ven. Quen escoita, que diga: ^__Ven. Quen teña sede, que veña; o que queira, que colla de balde auga da vida.
• ¹⁸A todo o que escoite as profecías deste libro declárolle que, se alguén engade algo ao aquí escrito, Deus mandaralle as pragas escritas neste libro.
• ¹⁹E se alguén quita algo do contido neste libro profético, Deus quitaralle a súa participación da árbore da vida e da cidade santa, descritas neste libro.
• ²⁰Quen testemuña estas cousas, di: ^__Si, veño axiña. Amén! Ven, Señor Xesús!
• ²¹A graza do Señor Xesús vos acompañe a todos!