Capítulo 8

TERCEIRA SECCIÓN:

O SÉTIMO SELO E A SERIE DAS SETE TROMPETAS

• ¹E cando abriu o sétimo selo, houbo, coma media hora, un silencio no ceo.
• ²E vin os sete anxos, que están sempre en pé diante do trono de Deus. Déronselles sete trompetas.

Oracións dos fieis pola chegada do Reino, e resposta de Deus

• ³Chegou outro anxo cun incensario de ouro. Púxose ao pé do altar e déuselle moito incenso, para que o ofrecese no altar de ouro, que está diante do trono, coas oracións de todo o pobo santo.
• ⁴E das mans do anxo que está diante do trono de Deus, subiu o fume do incenso coas oracións do pobo santo.
• ⁵Colleu o anxo o incensario, encheuno co rescaldo do altar e botouno na terra: houbo lóstregos, berros, tronos e un terremoto.
• ⁶Entón os sete anxos, que tiñan as sete trompetas, preparáronse para tocar.

As catro primeiras trompetas: resposta de Deus

• ⁷Tocou o primeiro e caeu na terra unha sarabiada de lume mesturado con sangue: ardeu a terceira parte da terra e a terceira parte das árbores e toda a herba verde.
• ⁸Logo tocou o segundo anxo e botouse ao mar algo coma un monte grande ardendo: fíxose sangue a terceira parte do mar
• ⁹e morreu a terceira parte das criaturas vivas do mar e esnaquizáronse a terceira parte dos barcos.
• ¹⁰Tocou logo o terceiro anxo e caeu do ceo unha estrela grande, ardendo en labarada, e caeu sobre a terceira parte dos ríos e das fontes.
• ¹¹A estrela chamábase Asente. E a terceira parte das augas volveuse en auga de asente e moitos dos homes morreron por culpa destas augas, que se volveron amargas.
• ¹²Logo tocou o cuarto anxo e tremelicou a terceira parte do sol, a terceira parte da lúa e a terceira parte das estrelas: escureceuse a terceira parte de cada un deles, e un terzo do día non alumou e o mesmo a noite.

Aviso de ameaza

• ¹³E mirei e oín o que berraba con voz potente unha aguia, que estaba voando polo medio do ceo: ^__Ai, ai, ai dos veciños da terra, por causa dos outros toques de trompeta, que tres anxos van tocar!