Capítulo 10

O exemplo dos israelitas no deserto

• ¹Porque eu non quero, irmáns, que ignoredes que os nosos pais estiveron todos baixo a nube; que todos pasaron polo medio do mar;
• ²que, na nube e no mar, todos recibiron o bautismo de Moisés;
• ³que todos comeron o mesmo alimento espiritual
• ^4__pois bebían da pedra espiritual que os acompañaba: e esa pedra era Cristo^__.
• ⁵Pero, con todo, a maior parte deles non lle agradou a Deus, xa que os seus cadáveres ficaron estrados polo deserto.
• ⁶Isto sucedeu como un exemplo para nós, co fin de que non teñamos degoiros do mal, como eles os tiveron.
• ⁷Nin vos fagades idólatras, o mesmo que algúns deles, como está escrito: Sentou o pobo a comer e a beber, e logo levantáronse para se divertiren.
• ⁸Nin nos entreguemos á impureza, como fixeron algúns deles, e nun día caeron vinte e tres mil.
• ⁹Nin tentemos o Señor, como algúns deles o tentaron e pereceron mordidos polas serpes.
• ¹⁰Nin murmuredes, coma algúns deles, que pereceron vítimas do exterminador.
• ¹¹Isto sucedeulles a eles como exemplo, pero escribiuse para o noso escarmento, para nós que vivimos na fin dos tempos.
• ¹²De xeito que o que crea estar de pé, teña coidado de non caer!
• ¹³E a vós non vos viñeron tentacións que superen as forzas humanas. Fiel é Deus, que non consentirá que teñades tentacións superiores ás vosas forzas: coa tentación havos dar tamén os medios para poder saír dela.

O banquete sagrado e os banquetes profanos

• ¹⁴Polo tanto, meus benqueridos, fuxide da idolatría.
• ¹⁵Fálovos como se lle fala á xente asisada: xulgade vós mesmos o que digo.
• ¹⁶A copa da bendición que bendicimos, non é unha comuñón co sangue de Cristo? O pan que partimos, non é unha comuñón co corpo de Cristo?
• ¹⁷E como hai un único pan, tamén nós, sendo moitos, formamos un único corpo, porque todos participamos dese único pan.
• ¹⁸Ollade para o Israel histórico: os que comen as vítimas, non están en comuñón co altar?
• ¹⁹Que quero dicir entón?: que a carne inmolada aos ídolos é algo? ou que é algo o ídolo?
• ²⁰Ao contrario, digo que os sacrificios que ofrecen os pagáns honran os demos e non a Deus; e eu non quero que entredes en comuñón cos demos.
• ²¹Non podedes beber a copa do Señor e a copa dos demos. Non podedes participar na mesa do Señor e na mesa dos demos.
• ²²Ou é que queremos desafiar o Señor? Ou somos nós máis fortes ca El?

Solucións prácticas

• ²³“Todo está permitido”, pero non todo me presta; “todo está permitido”, pero non todo é construtivo.
• ²⁴Que ninguén busque o seu propio interese, senón o dos demais.
• ²⁵Comede todo o que se vende na cortadoría, sen preguntar cousa ningunha por motivos de conciencia,
• ²⁶pois do Señor é a terra e todo o que a enche.
• ²⁷Se algún infiel vos convida e queredes ir, comede todo o que vos poñan e non preguntedes nada por motivos de conciencia.
• ²⁸Pero se un vos di: “Isto foi sacrificado aos ídolos”, daquela non comades. Por causa de quen vos avisou e pola conciencia.
• ²⁹Non me refiro á vosa conciencia, senón á do outro. –Pero, por que a miña liberdade vai ter de xuíz a conciencia doutro?
• ³⁰E, se eu cando participo nunha comida llo agradezo a Deus, por que me teñen que criticar por algo que como dándolle as grazas?
• ³¹Mirade, tanto que comades como que bebades, como calquera cousa que fagades, facédeo todo para gloria de Deus.
• ³²Non sexades tropezo nin para os xudeus, nin para os gregos, nin para a Igrexa de Deus.
• ³³Así tamén eu procuro agradar a todos en todo, non buscando a miña comenencia, senón a da maioría, para que se salven.