Capítulo 9

O exemplo de Paulo

• ¹Non son eu libre? Non son apóstolo? Logo non vin a Xesús, o noso Señor? Non sodes vós a miña obra no Señor?
• ²Se para outros non son eu apóstolo, para vós si que o son, pois vós sodes, no Señor, o selo do meu apostolado.
• ³Esta é a miña defensa contra os que me demandan:
• ⁴Acaso non temos dereito a comer e beber?
• ⁵Non temos dereito a levar connosco unha muller irmá, o mesmo ca os demais apóstolos e os irmáns do Señor e Pedro?
• ⁶Ou é que soamente eu e mais Bernabé carecemos do dereito de non traballar?
• ⁷Quen foi algún día á guerra gastando do seu? Quen planta unha viña e non come o seu froito? Quen coida un rabaño e non se alimenta do seu leite?
• ⁸Ou estou falando con criterios humanos? Non di tamén a lei iso mesmo?
• ⁹Pois é precisamente na Lei de Moisés onde está escrito: Non lle poñas o bozo ao boi que malla. Impórtanlle acaso os bois a Deus?
• ¹⁰Ou non está ben claro que o di por nós? Sen dúbida está escrito por nós, pois quen labra precisa labrar con esperanza e tamén o que malla, coa esperanza de levar a súa parte.
• ¹¹Se nós sementamos en vós os bens espirituais, é moito que fagamos colleita nos vosos bens materiais?
• ¹²Se outros teñen tal dereito sobre vós, non temos nós máis? Pero nós nunca nos aproveitamos dese dereito, ao contrario, aturamos todo, para non lle poñer ningún tropezo ao Evanxeo de Cristo.
• ¹³Non sabedes que os que celebran o culto viven do templo, e que os que serven no altar teñen parte nel?
• ¹⁴Do mesmo xeito, o Señor prescribiulles aos que anuncian o Evanxeo que vivan do Evanxeo.
• ¹⁵Pero eu non me aproveitei de nada diso, nin escribo estas cousas para aproveitarme agora: mellor morrer que... Non, a miña gloria ninguén ma tirará.
• ¹⁶Porque o mero feito de predicar o Evanxeo non é para min gloria ningunha: é unha necesidade que teño enriba de min. Pobre de min se non predico o Evanxeo!
• ¹⁷Pois así, se fago isto polo meu gusto, xa teño premio; pero, se o fago a contragusto, é un simple cargo que estou obrigado a administrar.
• ¹⁸Onde está, logo, o meu premio? En que, cando predico o Evanxeo, o fago gratuitamente, renunciando aos dereitos que este Evanxeo me confire.
• ¹⁹Pois, sendo como son libre con respecto a todos, de todos me fixen escravo para ganar os máis posibles.
• ²⁰Fíxenme xudeu cos xudeus, para ganar os xudeus; suxeito a lei cos que están baixo a lei ^__eu, que non o estou^__, para ganar os que están baixo a lei.
• ²¹Cos que están sen a lei, fíxenme como sen lei ^__non estando eu sen a Lei de Deus, tendo como teño a Lei de Cristo^__, para ganar os sen lei.
• ²²Cos débiles fíxenme débil, para ganar os débiles. Fíxenme todo con todos, para salvar algúns por riba de todo.
• ²³Todo o fago polo Evanxeo, para ter algunha parte nel.
• ²⁴Non sabedes que os corredores no estadio corren todos pero soamente un leva o premio? Correde, logo, de maneira que levedes premio.
• ²⁵Todos os que compiten impóñense unha disciplina total: iso que eles é para conseguiren unha coroa perecedoira; nós, en cambio, unha imperecedoira.
• ²⁶Eu, pola miña parte, corro, pero non ao que saia; loito, pero non dando golpes ao aire.
• ²⁷Pola contra, castigo duramente o meu corpo e trátoo coma un escravo. Non vaia suceder que, despois de lles predicar aos outros, quede eu descualificado.