Capítulo 3

ATAQUE AOS XUDAIZANTES

O ideal que propoñen fora o de Paulo

• ¹Do resto, meus irmáns, estade alegres no Señor. Repetirvos o dito noutras ocasións, a min non me custa, e a vós dávos seguranza.
• ² Ollo aos cans! Ollo aos obreiros de moita parola e pouco traballo! Ollo á falsa circuncisión!
• ³Porque a circuncisión verdadeira, esa sómola nós, que, impulsados polo Espírito, damos culto a Deus e poñemos a nosa gloria en Cristo Xesús, sen confiarmos en criterios externos.
• ⁴Aínda que, por confiar, eu tiña en que confiar, incluso en criterios externos. Se alguén coida que el ten en que confiar conforme eses criterios, eu teño máis:
• ⁵circuncisión aos oito días; do pobo de Israel; da tribo de Benxamín, nacido e criado hebreo; en canto á Lei, fariseo;
• ⁶en canto a celo, perseguidor da Igrexa; en canto á xustiza que manda a Lei, home sen chata.

Pero renunciou a el

• ⁷Mais todo o que daquela era para min un proveito, estimeino, por causa de Cristo, unha perda.
• ⁸Máis aínda, todo me parece perda comparado co grande que é coñecer a Cristo Xesús, o meu Señor. Por El tirei con todo e doulle tanto valor coma ao lixo, con tal de gañar a Cristo
• ⁹e de vivir nel; non por ter unha xustiza miña propia por cumprir a Lei, senón pola xustiza que se recibe como resposta á fe.
• ¹⁰Así podereino coñecer a El, experimentar a forza da súa resurrección e solidarizarme cos seus sufrimentos, reproducindo en min a súa morte,
• ¹¹para ver de chegar eu tamén á resurrección dos mortos.
• ¹²Non é que eu xa chegase á meta nin que xa chegase á perfección. Non. Eu aínda vou correndo, a ver se a alcanzo, xa que tamén eu fun alcanzado por Cristo Xesús.
• ¹³Irmáns, eu non boto de conta que a alcanzara. Velaquí o único que fago: esquezo o que quedou atrás, lánzome cara ao que está diante,
• ¹⁴bulo para pillar o premio ao que Deus desde arriba nos convoca en Cristo Xesús.
• ¹⁵Todos os perfectos, polo tanto, pensamos así. E se nalgún punto pensades doutro xeito, Deus hávolo esclarecer.
• ¹⁶Fóra disto, a onde queira que chegásemos, sigamos na mesma liña.

Seguir o exemplo de Paulo

• ¹⁷Irmáns, seguide todos o meu exemplo e reparade nos que camiñan conforme o modelo que tedes de nós.
• ¹⁸É que moitos ^__dos que xa vos teño falado e agora falo a chorar^__ pórtanse como inimigos da cruz de Cristo.
• ¹⁹Esa xente vai acabar na perdición: o Deus dela é o bandullo; o orgullo dela está na vergonza: xente que só se interesa polas cousas terreais.
• ²⁰Pero a nosa patria está no ceo, de onde nós agardamos un salvador, Xesús Cristo, o Señor.
• ²¹El ha transformar o noso pobre corpo, reproducindo en nós a gloria do seu propio corpo con ese poder que lle permite someter incluso o mesmo universo.